काठमाडौँ । सत्तारुढ दल नेकपा माओवादी केन्द्रमा विधान अधिवेशनबारे आइतबार पनि  छलफल भइरहेको छ ।  माओवादी केन्द्रले विधान अधिवेशनबारे केन्द्रीय पदाधिकारी र स्थायी समितिपछि केन्द्रीय समितिमा छलफल  थालेको हो ।  

केन्द्रीय समितिमा समसामयिक राजनीतिक विषय र आगामी फागुन १ गतेदेखि शुरु हुन लागेको विधान अधिवेशनबारे छलफल भइरहेको बैठकमा सहभागी नेताहरुले जानकारी दिएका छन् । राष्ट्रियसभा गृहमा शुरु भएको बैठकमा माओवादी केन्द्रले यसअघि सञ्चालन गरेको चार महिने ‘जनतासँग माओवादी विशेष अभियान’मा विशेष समीक्षा गर्ने कार्यसूची छ । माओवादी केन्द्रका उपाध्यक्ष एवं प्रवक्ता बैठकमा समसामयिक राजनीतिक विषयका अलावा पार्टीको काम कारबाही र  फागुन १ गतेदेखि तय गरिएको विधान सम्मेलनबारे पनि छलफल हुनेछ ।

माओवादी केन्द्रले चार महिने अभियानमा पार्टीको सङ्गठन निर्माण, पुनःनिर्माणका अलावा शहीद परिवार, बेपत्ता योद्धाका परिवार, घाइते अपाङ्गता भएका कार्यकर्तासँग भेटघाट गरेको थियो । सरकारमा रहेर गरिएको सुशासन र समृद्धिको अभियानबारे जनतालाई जानकारी गराएको थियो । गत भदौ १६ गतेदेखि सुरु भएको त्यो अभियान गत पुस १७ गतेसम्म चलेको थियो । 

बैठक आज र भोलिसम्म चल्नेछ । माओवादीको केन्द्रीय समिति ४ सय ९ सदस्यीय छ ।  वैकल्पिक केन्द्रीय सदस्य १ सय ९० जना छन् ।  सात वटा भौगोलिक र तीन गैरभौगोलिक प्रदेश समितिका पदाधिकारीलाई पनि बैठकमा आमन्त्रण गरिएको छ । 

माओवादी केन्द्रले  फागुन १, २ र ३ गते राजधानीमा विधान सम्मेलन गर्दैछ । विधान मस्यौदाका लागि माओवादी केन्द्रले उपाध्यक्ष पम्फा भुसालको संयोजकत्वमा विधान मस्यौदा समिति गठन गरेको थियो ।  समितिले प्रस्ताव गरेको विधानमाथि माओवादीको स्थायी समिति बैठकमा छलफल गरिसकेको छ ।