काठमाडौँ । आईसीसी विश्वकप लिग–२ को त्रिकोणात्मक एकदिवसीय सिरिजको पहिलो खेलमा नेपालले नामिबियालाई जितका लागि १ सय ३३ रनको सामान्य लक्ष्य दिएको छ ।

कीर्तिपुर क्रिकेट मैदानमा भएको खेलमा टस हारेर पहिले ब्याटिङ गरेको नेपालले ४१.१ ओभरमा सबै विकेट गुमाएर १३२ रन मात्र जोड्न सफल भयो ।  

नेपालका लागि भीम सार्कीले सर्वाधिक ४४ रनको योगदान दिए । उनले ८६ बलको सामना गर्दै दुई चौका र १ छक्का हिर्काए । त्यस्तै, गुलसन झाले २१ रन बनाए । उनले ३१ बलमा ३ चौका प्रहार गरेका थिए ।

करण केसीले ३८ बलमा १६ रन बनाए । कुशल मल्लले २२ बलमा १ चौका र १ छक्का हिर्काउँदै १५ रन बनाए । पवन शर्राफले १२ रन बनाए । नामिबियाका लागि जेरहार्ड इरासमसले ५ तथा रुबेन ट्रम्पेलम्यान र ज्याक ब्रसेलले २–२ विकेट लिए ।

ओपनर कुसल भुर्तेलाई शुन्य रनमा गुमाएको नेपालले पहिलो पावर प्ले भित्र ४ विकेट गुामएको थियो । 


एकदिवसीय विश्वकप छनोटका लागि महत्त्वपूर्ण मानिएको यस सिरिजमा नेपाललाई सबै खेल महत्त्वपूर्ण रहेको छ । 

अहिले नामिबिया १३३ रनको लक्ष्य लिएर व्याटिङ गर्दै छ ।