गण्डकी । कास्की जिल्ला टेनिस सङ्घको आयोजनामा आजदेखि पोखरामा चौथो संस्करणको मनुश्री भिग्नजित राष्ट्रिय जुनियर टेनिस प्रतियोगिता हुने भएको छ ।

प्रतियोगिताको तयारी पूरा भएको मङ्गलबार पोखरामा आयोजित पत्रकार सम्मेलनमा जानकारी दिइयो । प्रतियोगितामा ८, ९, १०, १२, १४ र १६ वर्षमुनि छात्र तथा छात्रा एकल, डबल्स गरी विभिन्न १४ विधामा प्रतिस्पर्धा हुने प्रतियोगिता संयोजक लोक गुरुङले जानकारी दिए । एकलतर्फ विजेताले १५ हजार तथा उपविजेताले ७ हजार ५ सय रुपैयाँसहित मेडल प्राप्त गर्ने छन् । 

छात्र तथा छात्रा ओपन डबल्सतर्फ  विजेताले  १० हजार र उपविजेताले ५ हजार रुपैयाँसहित मेडल प्राप्त गर्ने आयोजक संघका अध्यक्ष राजकुमार गुरुङले जानकारी दिनुभयो । 

चौध वर्ष एकलतर्फ विजेताले  १० हजार तथा उपविजेताले  पाँच हजार रुपैयाँ सहित मेडल प्राप्त गर्ने छन् । बाह्र वर्ष उमेर एकलतर्फ विजेताले  आठ हजार तथा उपविजेताले  चार हजार रुपैयाँसहित मेडल प्राप्त गर्ने छन् । 

प्रतियोगितालाई कुमार मोहनबहादुर शाहीले आफ्ना नाति नातिनीको नामबाट मुख्य प्रायोजन गरेका छन् । पोखरासहित काठमाडौँ, चितवन, बुटवलका खेलाडीले भाग लिने प्रतियोगिता निर्देशक कुमार अधिकारीले जानकारी दिए । 

पत्रकार सम्मेलनमा सङ्घ कास्कीका सदस्य प्रिति बराल, नेपाल खेलकुद पत्रकार मञ्च गण्डकीका उपाध्यक्ष राजाराम पौडेलले प्रतियोगिताबारे आफ्नो धारणा राखेका थियो ।