काठमाडौं । मलेसियामा जारी एसीसी वुमन्स प्रिमियर कपमा नेपालले माल्दिभ्सलाई २२८ रनको विशाल लक्ष्य दिएको छ । टस जितेर पहिला ब्याटिङ गरेको नेपालले निर्धारित २० ओभरमा ४ विकेट गमाउँदै २२७ रन जोडेको छ । 

माल्दिभ्सविरुद्धको आजको खेलमा रुविना क्षेत्रीले ऐतिहासिक ११८ रनको योगदान दिएकि थिइन् । आक्रामक इनिङ खेलेकि रुविनाले ५९ बलमा ११८ रन जोडेर अविजित रहिन् । उनले १० चौका र ५ छक्का प्रहार गरिन् । 

नेपालकी पूजा महतोले पनि अर्धसतक पूरा गरिन् । ३६ बलमा ५९ रन जोडेकि पूजाले ५ चौका र १ छाक्का प्रहार गरिन् । 

६१  रनको अवस्थामा ४ विकेट गुमाएको नेपालले त्यसपछि भने कुनै विकेट गुमाएन । रुविना र पूजाले पाचौँ  विकेटका लागि १६६ रनको कीर्तिमानी साझेदारी गरेका थिए । 

समूह ‘डी’ को खेलमा नेपालले लगातार दोस्रो जित निकाल्दै चार अङ्कका साथ क्वार्टरफाइनलमा स्थान बनाइसकेको छ । नेपालले पहिलो खेलमा हङकङ र दोस्रो खेलमा भुटानलाई समान आठ विकेटले पराजित गरेको थियो । माल्दिभ्स भने प्रतियोगितामा लगातार दोस्रो हार बेहोरर्दै प्रतियोगिताबाट बाहिरिसकेको छ । 

माल्दिस पहिलो खेलमा भुटान र दोस्रो खेलमा हङकङसँग पराजित भएको थियो ।