काठमाडौँ । क्यानडाविरुद्धको तेस्रो तथा अन्तिम एक दिवसीय खेलमा नेपालका ओपनर अनिल शाह र भीम सार्कीले कीर्तमानी साझेदारी गरेका छन् । आजको खेलमा अनिल र भीमले दोस्रो विकेटका लागि अविजित १ सय ८९ रनको साझेदारी गरे । यो साझेदारी एक दिवसीय क्रिकेटमा नेपालका लागि अहिलेसम्मकै उच्च साझेदारी हो । 

यसअघि सन् २०२३ मा कुशल भुर्तेल र आसिफ शेखले जिम्बावेविरुद्ध १ सय ७१ रनको साझेदारी गरेका थिए ।  

अनिल १ सय १२ रनमा अविजित रहे । उनले १ सय २४ बलमा १२ चौका र २ छक्का प्रहार गरे । यस्तै भीम १ सय १ रनमा अविजित रहे ।  भीमले १ सय २९ बलमा ११ चौका र १ छक्का प्रहार गरेका थिए । 

अनिल र भीमको यो कीर्तिमानी साझेदारीका कारण आजको खेलमा क्यानडा ९ विकेटले पराजित भएको थियो । 

यस अघि शनिबार सम्पन्न दोस्रो खेलमा पनि अनिल शाहले एकदिवसीय अन्तर्राष्ट्रिय क्रिकेटमा नेपालका लागि सबैभन्दा कम बलमा अर्धशतक पुरा गर्ने ब्याट्सम्यानको कीर्तिमान कायम गरेका थिए । दोस्रो खेलमा अनिलले केवल १९ बलमा ३ छक्का र ७ चौकाको मद्दतले ५० रन बनाएका थिए ।