काठमाडौँ । डलर देखाइ ठगी गर्ने फरार व्यक्ति पक्राउ परेका छन् ।  डलर देखाइ  ९ लाख ठगी गरी फरार रहेका सिन्धुपाल्चोकको बाह्रबिसे नगरपालिका–४ घर भई हाल बूढानीलकण्ठ नगरपालिका–५ टुसाल बस्ने २६ वर्षीय दिलकुमार लामा पक्राउ परेका हुन् । 

तेह्रथुम, म्याङ्लुङ नगरपालिका–९ घर भई हाल काठमाडौँ टेकु बस्ने ३२ वर्षीय गिरिराज लिम्बूलाई डलर देखाइ ठगी गरेको आरोपमा लामालाई आइतबार बूढानीलकण्ठ–५ टुसालबाट पक्राउ गरिएको प्रहरी परिसर भक्तपुरका सूचना अधिकारी वसन्त पाठकले जानकारी दिनुभएको छ ।  लामालाई प्रहरीले सोमबार सार्वजनिक गरेको छ ।

लिम्बूलाई ४० हजार डलर साट्ने प्रलोभनमा पारी गत कात्तिक २३ गते भक्तपुरको चाँगुनारायण नगरपालिका–७ मुहानेपोखरी बोलाइ रुमालको पोको दिइ ९ लाख लगी गएकामा रुमाल खोली हेर्दा रुमालमा कागज रहेको हुँदा ठगी भएको भनी पीडितले निवेदन दिएको प्रहरीले जनाएको छ । 

डलर देखाई ठगी गर्ने कार्यमा संलग्न अर्का व्यक्ति सिन्धुपाल्चोकको बाह्रबिसे–४ बस्ने वर्ष ३६ का अमृतकुमार लामालाई गत मङ्सिर २१ गते प्रहरीले पक्राउ गरिसकेको सूचना अधिकारी तथा प्रहरी नायव उपरीक्षक पाठकले बताउनुभयो ।