काठमाडौँ  । मुलुकमा पछिल्लो समय मृगौला फेल भएका बिरामी बढ्दै गएका छन् । 

मृगौला हाम्रो शरीरको एक महत्वपूर्ण अंग हो, जसले रगत शुद्ध गर्ने, शरीरबाट विषाक्त पदार्थ बाहिर निकाल्ने र रक्तचाप नियन्त्रण गर्ने काम गर्छ । मिर्गौलाको काम सुस्त हुँदा वा राम्रोसँग काम नगर्दा शरीरले केही संकेत दिन्छ। दुर्भाग्यवश, मानिसहरूले यी संकेतहरूलाई सामान्य मानेर बेवास्ता गर्छन् ।

समग्रमा मृगौला रोग बिस्तारै विकसित हुन्छ र कहिलेकाहीँ लक्षणहरू यति हल्का हुन्छन् कि मानिसहरूले तिनीहरूलाई बेवास्ता गर्छन्। यदि तपाई यी  विभिन्न ६  लक्षण मध्ये कुनै पनि लगातार महसुस गर्दै हुनुहुन्छ भने, यसलाई हल्का रूपमा नलिनु होस्। यो बेवास्ताले पछि मृगौला फेलजस्ता गम्भीर अवस्था निम्त्याउन सक्छ।
 
थकान र कमजोरी महशुस

यो पहिलो संकेत हो । थकित र कमजोर महशुस गर्नु हो। मिर्गौलाले रगतलाई राम्ररी सफा गर्न नसकेपछि शरीरमा विषाक्त पदार्थ जम्मा हुन थाल्छ। यसले व्यक्तिलाई धेरै काम नगरे पनि सँधै थकित र कमजोर महसुस गराउँछ।

पिसाबमा समस्या

दोस्रो संकेत पिसाबसँग सम्बन्धित समस्या हो। बारम्बार पिसाब लाग्नु, पिसाबमा जलन हुनु, यसको रंग गाढा वा फेनयुक्त हुनु। यी सबै लक्षणहरूले मृगौला फेल भएको संकेत गर्न सक्छन्। यदि पिसाबमा रगत देखियो भने यो अझ गम्भीर लक्षण हुन सक्छ।

अनुहार, आँखा वा खुट्टा सुन्निने

तेस्रो सामान्य लक्षण भनेको अनुहार, आँखा वा खुट्टा सुन्निने हो। मृगौलाले शरीरबाट अतिरिक्त पानी निकाल्न नसके पछि त्यो शरीरमा जम्मा हुन थाल्छ । यसको प्रभाव विशेष गरी बिहान आँखा मुनि सुन्निने वा खुट्टामा भारीपनको रूपमा देखिन्छ।

भोक नलाग्ने

चौथो संकेत भोक नलाग्नु र वाकवाकी लाग्नु हो। रगतमा फोहोर पदार्थको मात्रा बढ्दा पाचन प्रणालीमा असर पर्छ । यसका कारण व्यक्तिको खानामा रुचि घट्छ, वाकवाकी लाग्न थाल्छ र कहिलेकाहीँ बान्ता पनि हुन सक्छ।

चिलाउने र छाला सुख्खा हुनु

पाँचौं लक्षण छालामा चिलाउने र सुख्खापन हो। मिर्गौलाले खनिज र पोषक तत्त्वको सन्तुलन कायम राख्न नसक्दा छालामा असर पर्छ । लगातार चिलाउने, सुख्खा छाला र रातो दाग यसको लक्षण हुन सक्छ।

सास फेर्न गाह्रो

छैटौँ र गम्भीर लक्षण भनेको सास फेर्न गाह्रो हुनु हो ।  मृगौला फेल हुँदा शरीरमा पानी जम्मा हुन सक्छ, जसले फोक्सोमा दबाब दिन्छ। यसबाहेक रगतमा अक्सिजनको मात्रा कम हुँदा सास फेर्न गाह्रो हुन सक्छ।

मिर्गौलाको स्वास्थ्यको यसरी ख्याल गर्नुहोस्

मिर्गौला स्वस्थ राख्न प्रशस्त पानी पिउने, धेरै नुन र प्याक गरिएको खानेकुरा नखाने, रक्तचाप र मधुमेह नियन्त्रणमा राख्ने, चिकित्सकको सल्लाह बिना पेनकिलर वा अन्य औषधि सेवन नगर्ने । एजेन्सी