काठमाडौँ । विशेष अदालतको अध्यक्षमा न्यायाधीश सुदर्शनदेव भट्ट नियुक्त हुनुभएको छ । 

उच्च अदालतका न्यायाधीश भट्टलाई शुक्रबार बसेको मन्त्रिपरिषद् बैठकले विशेषको अध्यक्षमा नियुक्त गर्ने निर्णय गरेको हो । भट्टलाई  न्याय परिषद्को सिफारिसका आधारमा  विशेष अदालतको अध्यक्ष नियुक्त गरिएको हो ।

न्यायपरिषद्ले विशेष अदालतको अध्यक्षसहित चार जना नयाँ सदस्यहरूको नाम सिफारिस गरेको थियो । उच्च अदालतको वीरगञ्ज इजलासका न्यायाधीश नारायणप्रसाद पौडेल, उच्च अदालत सुर्खेतका न्यायाधीश हेमन्त रावल, जुम्ला इजलासका न्यायाधीश डिल्लीरत्न श्रेष्ठ र वीरगञ्ज इजलासका न्यायाधीश उमेश कोइरालालाई सदस्य तोकिएको छ ।

विशेष अदालतका अध्यक्ष र सदस्यहरू न्यायपरिषद्को परामर्शमा सरकारले तोक्ने कानुनी व्यवस्था छ । त्यही अनुसार अध्यक्ष भट्टसहितका सदस्यहरू तोकेको हो ।