काठमाडौँ । वीरगञ्जमा फैलिएको हैजा नियन्त्रण गर्न तीनै सुरक्षा निकायका स्वास्थ्यकर्मी परिचालन गरिएको छ । 

प्रधानमन्त्री केपी शर्मा ओलीले वीरगञ्जमा फैलिएको हैजा नियन्त्रणका लागि सरकारले तीव्र प्रयास गरिरहेको बताउनु भएको  छ । प्रधानमन्त्री ओलीले शुक्रबारको मन्त्रिपरिषद् बैठकले स्वास्थ्य मन्त्रालयको समन्वयमा नेपाली सेना, नेपाल प्रहरी र सशस्त्र प्रहरीका स्वास्थ्यकर्मी, डाक्टर र उपकरण परिचालन गर्ने निर्णय गरेको जानकारी गराउनुभएको छ । 

प्रधानमन्त्री ओलीले मन्त्रिपरिषद् बैठक पछि प्रतिनिधिसभामा सम्बोधन गर्दै रोग नियन्त्रणका लागि आवश्यक बजेट व्यवस्थापन गरिने र हैजाको स्रोत पत्ता लगाउन छानबिन भइरहेको बताउनुभयो । उहाँले हैजा र झाडापखालाको औषधि निःशुल्क उपलब्ध गराइएको र नारायणी उपक्षेत्रीय अस्पतालमा निःशुल्क उपचार भइरहेको समेत उल्लेख गर्नुभयो ।

हालसम्म वीरगञ्जमा ६ सय २४ जना संक्रमित भएकामा ४ सय ३७ जना निको भई घर फर्किएका छन्, भने १ सय ८७ जनाको उपचार भइरहेको छ ।  पछिल्लो २४ घण्टामा ८४ नयाँ बिरामी थपिएका छन् र तीन जनाको मृत्यु भएको छ । सरकारले रोग रोकथाम र उपचारमा तीव्र गतिमा काम गरिरहेको छ ।