काठमाडौँ । नेपाल प्रहरीको नयाँ महानिरीक्षक (आईजीपी) मा चन्द्रकुवेर खापुङ नियुक्त हुनुभएको छ । शुक्रबार बसेको मन्त्रिपरिषद् बैठकले खापुङलाई भदौ १९ गतेदेखि लागू हुने गरी नियुक्त गर्ने निर्णय गरेको हो।

हालका आईजीपी दिपक थापा भदौ १८ गते राति अवकाश हुने भएकाले नयाँ नेतृत्व चयन गरिएको हो। प्रधानमन्त्री केपी शर्मा ओली शनिबारदेखि चीन भ्रमणमा प्रस्थान गर्ने कार्यक्रम रहेकाले त्यसअघि बसेको मन्त्रिपरिषद्ले ३२ औँ आईजीपीको टुंगो लगाएको हो।

खापुङ हाल प्रहरी केन्द्रीय अनुसन्धान ब्यूरो (सीआईबी) को प्रमुखका रूपमा कार्यरत हुनुहुन्छ । उहाँ र र हालका आईजीपी थापाले एउटै समयमा इन्स्पेक्टर भर्नाका लागि फाराम भर्नुभएको थियो । लामो सेवाकाल र अनुसन्धान क्षेत्रमा देखाएको कुशल नेतृत्वका आधारमा सरकारले खापुङलाई प्रहरी नेतृत्वको जिम्मेवारी दिएको बताइएको छ।