काठमाडौँ । प्रधानमन्त्री ओलीले चीन भ्रमणमा लिम्पियाधुरा र लिपुलेक मुद्दा उठाउनु हुने भएको छ । प्रधानमन्त्री ओलीले चीन भ्रमणमा नेपालको लिम्पियाधुरा र लिपुलेकबारे भारत र चीनले गरेको व्यापार मार्ग सम्झौताको विषयमा आवाज उठाउने बताउनु भएको छ । 

प्रधानमन्त्री शुक्रबार संसद् भवन परिसरमा सञ्चारकर्मीहरूसँग कुरा गर्दै यो मुद्दा उच्चस्तरीय भेटघाटमा अवश्य उठ्ने जानकारी गराउनु भएको छ । 

मन्त्रिपरिषद्को शुक्रवारको बैठकले प्रधानमन्त्री ओलीको भदौ १४ देखि १८ गतेसम्मको चीन भ्रमण स्वीकृत गरेको छ । उहाँ चिनियाँ राष्ट्रपति सी चिनफिङको निमन्त्रणमा  सांघाई सहयोग सङ्गठन (एससीओ) शिखर सम्मेलनमा भाग लिन तियान्जिन जाँदै हुनुहुन्छ।

भ्रमण टोलीमा श्रीमती राधिका शाक्य, शिक्षामन्त्री रघुजी पन्त, पर्यटनमन्त्री बद्रीप्रसाद पाण्डे, कांग्रेस उपसभापति पूर्णबहादुर खड्का, आर्थिक सल्लाहकार डा। युवराज खतिवडा, सांसद् छविलाल विश्वकर्मा लगायत छन् । एससीओ सम्मेलन भदौ १५ र १६ मा तियान्जिनमा आयोजना हुँदैछ, जसको उद्घाटन राष्ट्रपति सीले गर्नेछन्। भारतीय प्रधानमन्त्री नरेन्द्र मोदीसहित अन्य राष्ट्रप्रमुख पनि सहभागी हुनेछन् ।

ओलीले राष्ट्रपति सी र उपराष्ट्रपति हान झेङसँग भेटवार्ता गर्नु हुनेछ । साथै, उहााले एससीओ प्लस शिखर सम्मेलनलाई सम्बोधन गर्ने र जापानी आक्रमणविरुद्ध चीनको प्रतिरोध युद्धको ८०औँ वार्षिकोत्सव कार्यक्रममा सहभागी हुने कार्यक्रम छ ।