काठमाडौँ । विद्युतीय कारोबार ऐन अन्तर्गतको कसुरमा पक्राउ परेका राष्ट्रिय स्वतन्त्र पार्टी (रास्वपा) केन्द्रीय सदस्य डा अरनिको पाँडेविरुद्ध मुद्दामा बयान शुरु भएको छ । 

सरकारी वकिल कार्यालयले पाँडेविरुद्ध काठमाडौँ जिल्ला अदालतमा मुद्दा दर्ता भए लगत्तै शुक्रबारदेखि न्यायाधीश ध्रुवराज कार्कीको इजलासमा बयान थालिएको हो । 

पाँडेविरुद्ध प्रहरीले बुझाएको अनुसन्धान प्रतिवेदनका आधारमा जिल्ला सरकारी वकिल कार्यालयले मुद्दा दर्ता गरेको हो । बयान सकिएपछि थुनछेक बहस हुनेछ । त्यसपछि पुर्पक्षका लागि कारागार पठाउने वा साधारण तारेख तथा धरौटीमा छाड्ने मध्ये एक आदेश आउने छ ।

सम्भवत आजै थुनछेक बहस सकिने सम्भावना रहेको छ । पाँडेलाई प्रहरीको केन्द्रीय साइबर ब्यूरो भोटाहिटीले बुधबार साँझपक्राउ गरेको हो । पाँडेविरुद्ध विद्युतीय कारोबार ऐन अन्तर्गतको कसुरमा मुद्दा दर्ता भएको थियो।

पाँडेलाई अदालतले बिहीबार मात्रै चार दिन हिरासतमा राखेर अनुसन्धान गर्न म्याद दिएको छ । एकै प्रकृतिका मुद्दामा एमालेका नेता ऐन महरालाई हाजिरी जमानीमा छाडिएको छ । तर पाँडेलाई हिरासत राखेको भन्दै आलोचना समेत भएको छ ।

यसबारे सर्वत्र विरोध हुन थालेपछि फास्ट ट्रयाकमै पाँडेविरुद्ध मुद्दा दर्ता भएको स्रोतले बताएको छ । पाँडेले बेलायत बस्ने एक महिलालाई इमेल र ह्वाट्स एपमार्फत अपशब्द बोल्दै गाली गरेको आरोप छ । ती महिला नेपाल आएको बेलामा उजुरी दिएपछि पाँडेलाई प्रहरीले पक्राउ गरेको हो ।

पाँडेविरुद्ध उजुरी दिने महिला र पाँडे पूर्व चिनजानकै व्यक्तिहरु रहेको प्रहरीले बताएको छ । कुनै विषयमा उनीहरुबीच सम्बन्ध बिग्रिएपछि पाँडेले गाली गरेको आरोप छ ।

वातावरणविद् भनेर चिनिने पाँडे २०७९ साल भदौमा रवि लामिछाने नेतृत्वको राष्ट्रिय स्वतन्त्र पार्टीमा प्रवेश गरेका हुन् । उनी रास्वपा सरकारमा रहेको बेलामा २०८० सालमा राष्ट्रिय योजना आयोगको सदस्य समेत भएका थिए ।