नवलपरासी । सुस्ता गाउँपालिकामा ११ वर्षीय नाती र  हजुरबुवा मृत अवस्थामा भेटिएका छन् । 

गाउँपालिका–३ मर्चहवा बस्ने ६५ वर्षीय यक्षलाल चमार र उनका नाति  ११ वर्षीय गौचरण चमार मृत भेटिएका हुन् । उनीहरु आफू बस्दै आएको घर नजिकै मंगलबार बिहान मृत अवस्थामा भेटिएको प्रहरीले जनाएको छ । 

प्रहरीका अनुसार  बिहान ६ बजे तिर स्थानीयले नाति र हजुरबुवा दुवैलाई मृत अवस्थामा देखेपछि खबर गरेका थिए । घटनाबारे थप अनुसन्धान भइरहेको जिल्ला प्रहरीले जनाएको छ । अहिले घटनास्थलमा तालिम प्राप्त कुकुर समेत परिचालन गरी अनुसन्धान भइरहेको प्रहरी नायव उपरीक्षक रेशम बोहराले जानकारी दिनुभएको छ। घटना शङ्कास्पद देखिएको प्रहरीको भनाई छ ।

उनीहरु चार, पाँच वर्षदेखि नारायणी नदीको ५ नम्बर ठोकरबाट पाँच सय मिटरको दूरीमा रहेको कच्ची छाप्रोमा बसोबास गरी खेती गर्दै आइरहेका थिए । वृद्धका छोरा, बुहारी, दुई नाति र एक नातिनी रहेकामा मृतक नातिलाई हजुरबुवासँगै छाडेर बुहारी डेढ महिनादेखि आफ्नो माइती भारत गएको बताइएको छ । मृतकका छोरा रोजगारीको सिलसिलामा अन्यत्र गएपछि बुहारी माइत गएको जनाइएको छ ।