पर्सा । जिल्ला ट्राफिक प्रहरी कार्यालय पर्साले चालु आर्थिक वर्षको ६ महिनाको अवधिमा  १ करोड रुपैयाँ भन्दा बढी राजस्व सङ्कलन गरेको छ । 

ट्राफिक नियम उल्लङ्घन गरी चलाउने सवारी चालक तथा सवारी साधनमाथि कारबाही गरी चालु आवको साउनदेखि पुस मसान्त सम्ममा १ करोड  २ लाख ५१ हजार रुपैयाँ राजस्व सङ्कलन गरेको हो । त्यस अवधिमा विभिन्न किसिमका १० हजार ८ सय २० सवारीमाथि कारबाही गरी उल्लेखित राजस्व सङ्कलन गरिएको जिल्ला ट्राफिक प्रमुख प्रहरी निरीक्षक भाष्कर खतिवडाले जानकारी दिनुभएको छ । 

त्यस अवधिमा पर्सा जिल्लामा भएको ३ सय २६ सवारी दुर्घटनमा २७ जनाको मृत्यु भएको छ । जिल्ला ट्राफिक प्रहरीका अनुसार यस अवधिमा भएका सवारी दुर्घटनामा परी ७५ जना गम्भीर घाइते भएका छन् । गत आव २०७९/८० मा जिल्ला ट्राफिकले ट्राफिक नियम उल्लङ्घन गरी चलाउने सवारी चालक तथा सवारी साधनमाथि कारबाही गरी ३ करोड ४२ लाख ६५ हजार रुपैयँँ  राजस्व सङ्कलन गरेको थियो । 

यस वर्ष राजस्व अघिल्लो आव २०७८÷०७९ को तुलनामा २१ प्रतिशतले बढी भएको जिल्ला ट्राफिकले जनाएको छ । अघिल्लो आव २०७८÷७९ मा  कार्यालयले २ करोड ८५ लाख २१ हजार ५ सय रुपैयाँ राजस्व सङ्कलन गरेको थियो । ट्राफिक चेकजाँचमा गरिएको कडाइका कारण राजस्व सङ्कलनमा वृद्धि भएको प्रहरी निरीक्षक खतिवडाको भनाई छ ।  सवारी दुर्घटना न्यूनीकरण गर्ने उद्देश्यले जिल्ला ट्राफिक पर्साले जनचेतनामूलक कार्यक्रम समेत सञ्चालन गर्दै आएको छ ।