नवलपरासी । सदरमुकाम परासीमा खानेपानी महशुल बापतको करिब ४० लाख रुपैयाँ उठ्न सकेको छैन । स्थानीय नेतासहितका उपभोक्ताले खानेपानीको महशुल समयमा  नतिर्दा उल्लेखित रकम उठ्न नसकेको हो । 

समितिले  खानेपानी उपभोग बापतको बक्यौता भुक्तानीका लागि १५ दिनेसमय सीमा निर्धारण गरेको थियो । त्यस समयभित्र ३ लाख रुपैयाँ मात्रै महशुल भुक्तानी भएको समितिले जनाएको छ ।  ४३ लाख २३ हजार  रुपैयाँ  महशुल उठाउन बाँकी भएपछि  समितिले ताकेता दिँदै भुक्तानी नगरे धारा काट्ने, भुक्तानी नतिर्नेको नामावली  सार्वजनिक गर्ने चेतावनी दिएको थियो । तर १५ दिनको अवधिमा रु तीन लाख २१ हजारमात्र महसुल उठेको समितिका अध्यक्ष खगेश्वर पन्थीले बताउनुभयो ।  अझै ४० लाख महशुल उठन् बाँकी छ ।

यसबीचमा समितिले वडा नम्बर १ र २ मा तीन जना उपभोक्ताको धारा काटेर पानी वितरण रोकेको छ । स्थानीय राजनीतिक दलका नेताले नै महशुल नतिरेकोे समितिले जनाएको छ । ३ महिनासम्म महशुल नबुझाउने उपभोक्ताको बिना जानकारी धारा काट्ने साधारणसभाले निर्णय गरे पनि समितिले साधारणसभाको निर्णय प्रभावकारी रूपमा कार्यान्वयन गर्न सकेको छैन ।
 
समितिले केही संस्थागत र व्यक्तिगत गरी महशुल  नबुझाउने ९ वटा धारा यसअघि नै काटेको थियो । समितिले रामग्राम वडा नम्बर १ र ६ मा रहेका दुई वटा खानेपानी ट्याङ्कीबाट १ हजार ७ सय भन्दा बढी घरधुरीलाई खानेपानी वितरण गर्दै आएको छ । 

पोखरापालीमा रहेको ट्याङ्कीको पानी पनि अहिले वितरण भइरहेकाले धारा विस्तार गर्ने समितिको तयारी छ । तर कतिपय उपभोक्ताले संस्थाले विगतमा पर्याप्त र शुद्ध पिउने पानी वितरण गर्न नसकेको भन्दै धमिलो पानीको महशुल तिर्न नसकिने तर्क गर्दै आएका छन् ।