काठमाडौँ । क्यानडाविरुद्ध जारी तीन खेलको एक दिवसीय क्रिकेट श्रृंखलाको दोस्रो खेलमा  नेपालले क्यानडालाई ४ विकेटले पराजित गरेको छ । शनिबार सम्पन्न दोस्रो खेलमा नेपालका ओपनर ब्याट्सम्यान अनिल शाहले एकदिवसीय अन्तर्राष्ट्रिय क्रिकेटमा नेपालका लागि सबैभन्दा कम बलमा अर्धशतक पुरा गर्ने ब्याट्सम्यान बनेका छन् ।

उनी अर्धशतक बनाउँदै आउट भएका हुन् । उनको विकेट ईश्वरजोत सोहीले लिएका थिए । सोहीले अनिललाई एलबीडब्लूको धरापमा पारेका थिए । पेभेलियन फर्किनुअघि अनिलले केवल १९ बलमा ३ छक्का र ७ चौकाको मद्दतले ५० रन बनाएका थिए । 

अनिलले आसिफ शेखको कीर्तिमान तोडेका हुन् । आसिफ शेखले सन् २०२३ को मार्च १३ तारिखमा कीर्तिपुर मैदानमै खेलिएको आईसीसी क्रिकेट वल्र्ड कप लिग–२ अन्तर्गतको पपुवा न्यू गिनीविरुद्धको खेलमा २१ बलमा अर्धशतक बनाएका थिए । अनिलले भने १९ बलमै अर्धशतक पुरा गरेका हुन् । ६.३ ओभरमा अनिल २० औ वलमा आउट भएका थिए । उनि आउट हुँदा नेपालले स्कोर ६४ रन थियो ।