सुर्खेत । सुर्खेतका ३२ हजार बालबालिकालाई दादुरा र रुबेलाविरुद्धको खोप लगाइने भएको छ ।  स्वास्थ्य सेवा कार्यालयले ९ महिनादेखि ७ वर्ष र ६–१५ वर्ष बालबालिकालाई खोप लगाउने भएको हो । 

खोप सेवा प्रदान गर्न कार्यालयले २ सय २२ स्वास्थ्यकर्मीलाई तालिम प्रदान गरेको कार्यालय प्रमुख गणेशभक्त गौतमले जानकारी दिनुभएको छ । उहाँका अनुसार १ सय २५ बालबालिका बराबर १ स्वास्थ्यकर्मी र २ स्वयंसेवक खटाइने छ ।

पहिलो चरणमा सुर्खेतको गुर्भाकोट, भेरीगङ्गा, लेकबेँसी नगरपालिका र चिङ्गाड तथा बराहताल गाउँपालिकामा  फागुन १३–१५ र दोस्रो चरणमा वीरेन्द्रनगर, पञ्चपुरी नगरपालिका तथा चौकुने र सिम्ता गाउँपालिकामा खोप लगाइने कार्यालय प्रमुख गौतमले बताउनुभयो । खोप कार्यक्रम निःशुल्क र जीवन सुरक्षाका लागि भएकाले कसैलाई नछुटाउन उहाँले आग्रह गर्नुभयो ।

स्वास्थ्य सेवा कार्यालय सुर्खेतका जनस्वास्थ्य निरीक्षक घनश्याम बुढाले छुट भएका बालबालिका समेटिउन् भनेर पालिकास्तरीय खोप समन्वय समितिलाई पनि अभिमुखीकरण दिइसकिएको बताउनुभयो । ‘अभियानका लागि चाहिने सामग्रीको तर्जुमा भइसकेको छ’ उहाँले भन्नुभयो– ‘दादुरा रुबेला राष्ट्रिय खोप अभियान भएकाले यसलाई सफल पार्न सबै सरोकारवालामा समन्वय, सहकार्य र सहजीकरण आवश्यक छ ।’