काठमाडौँ ।  तीन खेलको एकदिवसीय श्रृंखला अन्तर्गत आज जारी दोस्रो ओडीआईमा क्यानडा-११ ले  नेपाल  ‘ए’लाई २४१ रनको लक्ष्य दिएको छ । मूलपानीस्थित क्रिकेट मैदामा टस हारेर ब्याटिङको निम्तो पाएको क्यानाडा-११ ले ४९.५ ओभरमा सबै विकेट गुमाएर २४० रन बनायो । 

क्यानडा–११ का लागि ओपनर ब्याट्सम्यानद्वय एरोन जोन्सन र श्रीमन्था विजयरत्नेले गतिलो सुरुआत दिलाएका थिए । उनीहरुले ६४ रनको साझेदारी गरे । एरोन जोन्सनले ३६ र श्रीमन्था विजयरत्नेले ४१ रन बनाए ।

चौथो नम्बरका ब्याट्सम्यान नवनित धालिवालले टोलीको खातामा ४६ रन थपे । उनले जिम्मेबारीपूर्वक ब्याटिङ गर्दै ६० बलमा एक छक्का र ६ चौका प्रहार गरे ।  छैटौँ नम्बरमा क्रिज समाल्न आएका श्रेयष मोभाले अर्धशतक बनाए । उनले ६८ रन बटुले । मोभाले ८२ बलमा पाँच चौका हिर्काए ।

नेपाल ‘ए’ का बलर साहब आलमले तीन विकेट लिए । उनले १० ओभरमा एक मेडन राख्दै ३८ रन खर्चिए । शेर मल्ल र रासिद खानले पनि दुई–दुई विकेट हात पारे । सागर ढकाल र बसिर अहमदले पनि एक–एक विकेट लिए ।


नेपालको ‘ए’ टोलीले क्यानडा–११ सँग तीनवटा अनौपचारिक एकदिवसीय खेलको शृंखला खेल्दैछ । शृंखलाको पहिलो खेलमा क्यानडा–११ चार विकेटले विजयी भएको थियो । तेस्रो एकदिवसीय खेल बिहीबार खेलिने छ ।