काठमाडौँ। संसदीय समितिबाट  खाद्य स्वच्छता तथा गुणस्तरसम्बन्धी कानुनलाई संशोधन र एकीकरण गर्न बनेको विधेयक पारित भएको छ ।

खाद्य स्वच्छता विधेयक प्रतिनिधिसभाको कृषि, सहकारी तथा प्राकृतिक स्रोत समितिको शुक्रबार बसेको बैठकले सर्वसम्मति रुपमा पारित गरेको हो। लामो समयदेखि अल्झिएको विधेयकमा सहमति जुटाउन कृषि समितिले उपसमिति बनाएको थियो । उपसमितिले तयार पारेको प्रतिवेदनमाथि छलफल गरेर मूल समितिले शुक्रबार पारित गरेको हो ।

विधेयकमा सडे–गलेको, फोहोर मैला मिसिएको, विषाक्त अवस्थामा राखिएको, मानव उपयोगका लागि अनुपयुक्त, रसायनको मात्रा तोकिएको भन्दा बढी राखिएको खाद्य पदार्थको उत्पादन, प्रशोधन निकासी, पैठारी, सञ्चय, ढुवानी र बिक्री वितरण गर्न गराउन नहुने उल्लेख गरिएको छ । 

विधेयकमा निर्धारित गुणस्तर भन्दा न्यूनस्तरका खाद्य पदार्थ बिक्री वितरण गर्ने, न्युनस्तरका खाद्य पदार्थ उच्च गुणस्तरको हो भनी ढाँट्ने वा प्रयोग गरेको समिश्रण वा दाबीमा झूठो जानकारी दिएर झुक्याउनेलाई कैद सजाय व्यवस्था गरिएको छ । 

खाद्य स्वच्छता विधेयकमा खाद्य पदार्थ अन्तर्गत मानिसले उपभोग गर्ने अप्रशोधित, अर्ध प्रशोधित वा प्रशोधित खाद्य वा पेय पदार्थ, त्यसमा प्रयोग गरिने पोषक तत्व, खाद्य योगशील (फूड एडिटिभ) वा मरमसला, आहारपूरक खाद्य पदार्थ, प्याकेजिङ गरिएको पिउने पानी, मदिराजन्य पेय पदार्थ, चुइगम र बबलगम लगायत राखिएको छ ।