पाँचथर । फालेलुङ गाउँपालिकाले सार्वजनिक कार्यक्रममा  खादा, ब्याच र प्लाटिकका माला प्रयोगमा प्रतिबन्ध लगाएको छ । कार्यपालिका बैठकमा भएको निणर्य सार्वजनिक गर्दै गाउँपालिकाले बिनियोजन गरेको बजेटबाट व्ययभार हुने कुनै पनि कार्यक्रममा यस्ता सामग्री प्रयोग नगर्न भनेको हो ।

‘गाउँपालिकाको बिनियोजित बजेटबाट व्ययभार हुने सभा, सम्मेलन, तालिम गोष्ठी सहितका सार्वजनिक कार्यक्रममा यस्ता सामग्री प्रयोग नगर्न जानकारी गराइन्छ, कुनै निकायले यस्ता सामग्री प्रयोग गरेर बील भपाई पेश गरेमा भुक्तानी दिइने छैन,’ पालिकाबाट जारी सूचनामा भनिएको छ ।

आयातित सामग्रीको साटो स्थानिय फूलका माला र सल्ला वा पिपलका पात र गुच्छा प्रयोग गर्न जस्को कारण वातावरणीय हिसाबले र आर्थिक हिसावले समेत ठिक हुने गाउँपालिका अध्यक्ष बीरबिक्रम थाम्सुहाङले बताउनुभयो । 
 
प्रयोग नगरी नहुने धार्मिक कार्यक्रममा भने खादा प्रयोगमा कडाइ गरिने छैन । निणर्य गाउँपालिकामा रहेका सबै सरकारी कार्यालय, शैक्षिक र सामाजिक संस्थामा लागू हुने प्रमुख प्रशासकीय अधिकृत डम्बरबहादुर आङदेम्बेले बताउनुभयो ।