काठमाडौँ । श्रीलङ्काको मुद्रास्फीति जनवरीमा बढेर ६ दशमलव ४ प्रतिशत पुगेको छ। सन् २०२३ को डिसेम्बरमा मुद्रास्फीति  ६ दशमलव ४ प्रतिशत रहेको जनगणना तथा तथ्याङ्क विभाग (डिसिएस) ले जनाएको छ ।

खाद्य मुद्रास्फीति डिसेम्बर २०२३ मा शून्य दशमलव तीन प्रतिशतबाट  जनवरी महिनामा ३ दशमलव ३ प्रतिशतमा बढेको  डिसिएसले आफ्नो पछिल्लो विज्ञप्ति सार्वजनिक गरेको हो । गैर–खाद्य समूहको मुद्रास्फीति पनि डिसेम्बरमा पाँच दशमलव आठ प्रतिशतबाट बढेर जनवरीमा सात दशमलव नौ प्रतिशत पुगेको छ ।

डिसिएसका अनुसार मुख्यतया आवास, पानी, बिजुली, ग्यास, शिक्षा, कपडा, मादक पेय पदार्थ, सुर्तीजन्य र लागुऔषध, मनोरञ्जन र संस्कृति, विविध वस्तु र सेवाहरू र स्वास्थ्यका कारण मुद्रास्फीति बढेको हो ।

सन् २०२२ सेप्टेम्बरदेखि श्रीलङ्काको मुद्रास्फीति लगातार घट्दै गएको छ । त्यो समयमा मुद्रास्फीति ६९ दशमलव ८ प्रतिशत थियो । जनवरी महिनाको शुरुमा केन्द्रीय बैङ्कका गभर्नर नन्दलाल विरासिङ्गेले मूल्य अभिवृद्धि करमा वृद्धि र आपूर्ति पक्ष समस्याका कारण तरकारीको मूल्य बढेको भन्दै जनवरीमा श्रीलङ्काको मुद्रास्फीति करिब ७ प्रतिशतले बढ्नसक्ने बताउनुभएको थियो ।