काठमाडौँ । चिनियाँ राष्ट्रपति सी जिनपिङ कम्बोडियामा पुग्नुभएको छ । राष्ट्रपति सी बिहीबार राजधानी नोम पेन पुगेको चीनको ग्लोबल टेलिभिजन (सीजीटीएन) ले  जनाएको छ ।  

स्रोतका अनुसार चीनको क्षेत्रीय व्यापार सम्बन्धलाई बलियो बनाई अमेरिकी समकक्षी डोनाल्ड ट्रम्पले लगाएको चर्को करको प्रभावलाई कम गर्ने प्रयास स्वरुप राष्ट्रपति सी भियतनाम र मलेसियाको भ्रमणपछि कम्कोडिया पुग्नुभएको हो । 

बिहीबार नोम पेनको विमानस्थलमा उहाँलाई सैन्य स्वागतसहित राजा नोरोडोम सिहामोनीले स्वागत गर्नुभएको थियो ।  राष्ट्रपति सी ले पूर्व नेता हुन सेन र उहाँका छोरा तथा प्रधानमन्त्री हुन मानेटसँग बैठक गर्नुअघि बिहीबार दिउँसो दरबारमा भेटवार्ता गर्ने कार्यक्रम तय भएको जनाइएको छ । 

अन्तर्राष्ट्रिय मुद्रा कोषका अनुसार कम्बोडियाको सबैभन्दा ठुलो व्यापारिक साझेदार र लगानीको स्रोत चीन हो । नोम पेन एसियामा चीनका भरपर्दो समर्थक हुन मानेटले सीको भ्रमणलाई अर्थपुर्ण र मित्रताको प्रतिकको रुपमा वर्णन गर्नुभएको छ । 

उहाँले दुई देशबीच सार्वभौमिकता, समानता र आन्तरिक मामिलामा हस्तक्षेप नगर्ने सिद्धान्तमा आधारित सम्बन्ध रहेको बताउनुभएको छ । यसै क्रममा उहाँले कम्बोडियाको सामाजिक आर्थिक विकासमा चीनले ‘महत्वपूर्ण भूमिका खेलेको पनि बताउनुभएको छ ।  उहाँका अनुसार यस वर्ष चीन र कम्बोडियाले कूटनीतिक सम्बन्धको ६७ वर्षगाँठ मनाउँदैछन् ।

चालु महिनाको शुरुमा ट्रम्पले गरेको चर्को कर घोषणापछि विश्वब्यापी रुपमा यस विषयमा बहस भइरहेको छ ।  कम्बोडियाली वाणिज्य मन्त्रालयका अनुसार हुन मानेटले वासिङ्टनलाई ‘आपसी समझदारी र वार्ताका लागि कम्बोडियाको विश्वास व्यक्त गर्दै  अमेरिकी सामानमा आफ्नो कर घटाउने प्रतिवद्धता सहित पत्र लेख्नुभएको छ । एजेन्सी