हेटौँडा । आन्तरिक राजस्व कार्यालय, हेटौँडाले ६ महिनामा लक्ष्यभन्दा  कम राजस्व सङ्कलन गरेको छ । 

कार्यालयका अनुसार चालु आर्थिक वर्षको साउनदेखि पुस मसान्तसम्म ४ अर्ब १४ करोड  ३० लाख ९५ हजार रुपैयाँ राजस्व सङ्कलन गर्ने लक्ष्य रहेकामा २ अर्ब ९३ करोड ११ लाख ७६ हजार राजस्व सङ्कलन भएको जनाइएको छ । 

कार्यालयले चालु आर्थिक वर्षमा ८ अर्ब ८० करोड ४५ लाख २४ हजार रुपैयाँ राजस्व सङ्कलन गर्ने लक्ष्य लिएको थियो । कार्यालयबाट प्राप्त विवरणअनुसार ६ महिनामा आयकरतर्फ  ४८ करोड छयासी लाख ६७ हजार, घरभाडा करतर्फ  ७८ लाख ९२ हजार,  ब्याज करतर्फ ४ करोड पाँचलाख ८१ हजार, आन्तरिक करतर्फ ४९ करोड ९० लाख ६८ हजार, अन्तःशुल्क करतर्फ १ अर्ब ६१ करोड ४८ लाख २७ हजार  तथा स्वास्थ्यसेवा करतर्फ  २८ करोड १ लाख ४१ हजार रुपैयाँ राजस्व सङ्कलन भएको जनाएको छ ।
 
६ महिनामा ३२ हजार १ सय ८६ करदातामध्ये १२ हजार ७ सय २१ करदाताले  आयकर तिरेका थिए भने १९ हजार चार सय ६५ जनाले तिर्न बाँकी रहेको छ । आयकर नतिर्नेमा ठूला करदाता नै २ हजार ७ सय ५ जना रहेका बताइएको छ । 
 
बागमती प्रदेशको राजधानी हेटौँडा भए पनि ठूला उद्योग तथा व्यापार/व्यवसाय बन्द भएको र सञ्चालनमा रहेका उद्योग तथा व्यवसायको अवस्था नाजुक भएकाले राजस्व सङ्कलनमा समस्या भएको सो कार्यालयका कर्मचारीले जनाएका छन् ।
 
प्रमुख करअधिकृत तुलसीप्रसाद भट्टराई बढी कर आउने उद्योग केही समयदेखि बन्द रहेका कारण राजस्व सङ्कलन लक्ष्यको तुलनामा कम भएको बताउनुहुन्छ ।  कार्यालयले आर्थिक वर्ष २०७९/८० मा  ७ अर्ब  ५० करोड ३९ लाख ४२ हजार राजस्व सङ्कलन गर्ने लक्ष्य लिएकामा ६ अर्ब ६० करोड ८८ लाख २२ हजार रुपैयाँ सङ्कलन गरेको थियो । गत आर्थिक वर्ष पनि लक्ष्यको तुलनामा कम राजस्व सङ्कलन भएको थियो ।