तनहुँ ।  भानु नगरपालिकाले प्राविधिक शिक्षा पढ्ने गरिब तथा जेहेन्दार विद्यार्थीलाई छात्रवृत्ति प्रदान गरेको छ । 

हरेक वडाबाट दुई जनाका दरले २६ जनालाई छात्रवृत्ति प्रदान गरिएको प्रमुख प्रशासकीय अधिकृत गौतमराज भण्डारीले जानकारी दिनुभएको छ । 

हरेक विद्यार्थीलाई . एक लाख ५० हजार रुपैयाँका दरले ३९ लाख रकम वितरण गरिएको भण्डारीले बताउनुभयो । उहाँले भन्नुभयो– ‘प्राविधिक जनशक्ति उत्पादन गरी यसै नगरपालिकामा प्राथमिकताका आधारमा उहाँहरुलाई रोजगारी दिने समेत योजना बनाएका छौँ । एमबिबिएस अध्ययनका लागि पूर्ण छात्रवृत्तिमा नाम निकालेको अवस्थामा प्रत्येक वर्ष वार्षिक रूपमा एक लाखका दरले पाँचवर्षसम्म  पाँच लाख प्रदान गर्ने निर्णय भएको छ ।’

नगरपालिकाको पाठ्यक्रममा आदिकवि भानुभक्त आचार्यको जीवनीलगायतका अन्य विषयवस्तु समेटी स्थानीय पाठ्यक्रम ‘हाम्रो भानु’ तयार गरेर कक्षा १ देखि ८ सम्म नगरपालिकाका सबै विद्यालयहरूमा निःशुल्क वितरण गरिएको छ । यस्तो पाठ्यक्रम निर्माण गर्नेमा गण्डकी प्रदेशमै भानु नगरपालिका पहिलो भएको शिक्षा शाखा प्रमुख ध्रुवराज पौडेलले बताउनुभयो । 

सरकारले बालविकास केन्द्र देखि कक्षा ५ सम्ममा प्रतिव्यक्ति  १५ रुपैयाका दरले दिवा खाजाका लागि अनुदान दिँदै आएकोमा नगरपालिकाले  पाँच थप गरी प्रतिविद्यार्थी  २० रुपैया पुयाई कक्षा ६ सम्म विस्तार गरेको छ ।