भोजपुर । खोङटाङ–चोलन्ती–खावा–पाँचधारे सडक कालोपत्र थालिएको छ । मध्यपहाडी लोकमार्गको शून्यविन्दुबाट कालोपत्र थालिएको हो । 

यो सडकखण्डको करिब २५ किलोमिटरमध्ये पहिलो खण्डमा शून्यविन्दुबाट २ करोड ६१ लाख ७१ हजार ६ सय ३१ रुपैयाँ लागतमा कालोपत्र थालिएको स्थानीय पूर्वाधार विकास आयोजना कार्यालयले जनाएको छ । 

‘खोङटाङ–चोलन्ती–खावा–पाँचधारे सडकखण्डको शून्यविन्दुबाट कालोपत्रको काम थालेका छौँ’ टेम्केमैयुङ गाउँपालिका अध्यक्ष सरोज बस्नेतले भन्नुभयो– ‘यो सडकको करिब २५ किलोमिटरमध्ये डेढ किलोमिटर कालोपत्र हुन्छ ।’

यही सडकको दोस्रो खण्ड हुँगे गाउँ पुछारबाट पाँचधारेसम्म स्तरोन्नतिको काम पनि भइरहेको छ । यहाँ सडक डिभिजन कार्यालयले २ करोड र कोशी प्रदेश सरकारको २५ लाख गरी कूल २ करोड २५ लाख रुपैया लागतमा स्तरोन्नति गरिरहेको अध्यक्ष बस्नेतले जानकारी दिनुभयो ।