काठमाडौँ । प्रधानमन्त्री कप एकदिवसीय राष्ट्रिय क्रिकेट प्रतियोगितामा त्रिभुवन आर्मी क्लबले मधेस प्रदेशलाई १ सय २६ रनको भारी आन्तरले पराजित गरेको छ । 

जितका लागि ३ सय २१ रनको लक्ष्य पछ्याएको मधेस प्रदेश ४८ दशमलव ४ ओभरमा सबै विकेट गुमाउँदै १ सय ९४ रनमा समेटियो । मधेसका लागि पवन सराफले ८३ बलमा ७ चौका र ३छक्कासहित सर्वाधिक ६५ रन बनाए । मयन यादवले ३२ बलमा ६ चौकासहित ३२ बनाए । राजेश यादवले ४८ बलमा ५ चौकासहित ३२ रनमा अविजित रहँदा  रुपेश सिंहले १८, विशाल पटेलले १७ तथा हरिशङ्कर शाहले ४ रन बनाए ।

आर्मीका लागि साहब आलमले ४विकेट लिए भने सोमपाल कामीले २ तथा जितेन्द्र मुखिया र कुशल मल्लले समान १, १ विकेट लिए । त्यसअघि कीर्तिपुरस्थित त्रिभुवन विश्वविद्यालयको क्रिकेट मैदानमा टस हारेर पहिले ब्याटिङको निम्तो पाएको आर्मीले निर्धारित ५० ओभरमा ९ विकेटको क्षतिमा ३ सय २० रनको योगफल बनायो । आर्मीका लागि विनोद भण्डारीले ९३ बलमा ९ चौका र ६ छक्कासहित १ सय १३ रनको शतकीय पारी खेले । सन्तोष कार्कीले ४२, कुशल मल्ल र विवेक यादवले समान ३७, इमरान शेखले २६, भीम सार्कीले १८ तथा  बसिर अहमदले १६ रन बनाए ।  

आर्मीका लागि पाँचौ विकेटका लागि विनोद र कुशललले १ सय ३२ तथा पहिलो विकेटका लागि सन्तोष र इमरानले ५३ रनको साझेदारी गरेका थिए । मधेसका लागि रन्जित कुमारले ५  विकेट लिए भने विशाल पटेलले २ तथा राजेश यादव र रुपेश सिंहले समान १, १ विकेट लिए ।