काठमाडौँ । नेपाल स्टक एक्सचेञ्ज (नेप्से) परिसूचक मंगलबार पनि दोहोरो अंकले बढेको छ । नेप्से आज २० दशमलव ६२ अङ्कले वृद्धि भएको छ । 

नेप्से १ प्रतिशतले बढेर २ हजार ८० दशमलव १२ अंकमा कायम भएको छ । ३ सय ९ कम्पनीको १ करोड ७९ लाख ४९ हजार ५ सय ६२ कित्ता शेयर,  १ लाख ४ हजार ६ सय १९ पटक खरिदबिक्री हुँदा ६ अर्ब ११ करोड ८३ लाख १७ हजार ८ सय ६६ बराबरको कारोबार भएको नेप्सेले जनाएको छ । 

जलविद्युत् समूह शून्य दशमलव ४५, उत्पादन तथा प्रशोधन समूह शून्य दशमलव ०४ र म्युचुअल फन्ड समूह शून्य दशमलव १५ प्रतिशतले घटेका छन् भने अरू सबै समूहको उपसूचक बढेको छ । सबैभन्दा धेरै विकास बैङ्क समूह ५ दशमलव २१ र होटल तथा पर्यटन समूह ३ दशमलव ६४ प्रतिशतले बढेका छन् ।

८ कम्पनीको शेयर मूल्यमा सकारात्मक सर्किट लागेको छ । विकास बैङ्कको शेयर कारोबार बढेको देखिएको छ । कर्णाली डेभलपमेन्ट बैङ्क लिमिटेड, सिन्धु विकास बैङ्क लिमिटेड, कालिका लघुवित्त वित्तीय संस्था लिमिटेड, सप्तकोशी डेभलपमेन्ट बैङ्क लिमिटेड, अपर स्याङ्गी हाइड्रोपावर लिमिटेड, त्रिशूली जलविद्युत् कम्पनी लिमिटेड, मुक्तिनाथ कृषि कम्पनी लिमिटेड र हिमालय रिइन्सुरेन्स कम्पनीको शेयर मूल्य १० प्रतिशतले बढेको छ । सबैभन्दा धेरै धौलागिरि लघुवित्त वित्तीय संस्था लिमिटेडको शेयर मूल्य ८ दशमलव १९ प्रतिशतले घटेको छ ।

कारोबार रकमका आधारमा आज सबैभन्दा धेरै सोनापुर मिनरल्स एन्ड आयल लिमिटेडको  २१ करोड ४९ लाख ४५ हजार ८ सय ९३ बराबरको कारोबार भएको छ । कारोबार भएका शेयर सङ्ख्याका आधारमा भने नेपाल इन्फ्रास्ट्रक्चर डेभलपमेन्ट बैङ्क लिमिटेडको ८ लाख ५१ हजार ५० कित्ता शेयर किनबेच भएको छ ।