काठमाडौँ । आइतबार दिउसोदेखि देशका अधिकांश स्थानको मौसम बदली रही केही स्थानमा वर्षा भइरहेको छ ।  

मौसम विज्ञान विभाग अन्तर्गतको जल तथा मौसम पूर्वानुमान महाशाखाका अनुसार अहिले बागमती र गण्डकी प्रदेशका केहि स्थानमा सामान्य वर्षा भइरहेको छ भने बाँकी स्थानको मौसम सामान्यदेखि आंशिक बदली रहेको छ । 

महाशाखाका मौसमविद् सञ्जीव अधिकारीका अनुसार देशको पश्चिमी क्षेत्रबाट पश्चिमी वायु पुनः सक्रिय भएसँगै मौसम बदलीसहित केही स्थानमा सामान्य वर्षा भएको हो । उहाँले भन्नुभयो,“देशको पश्चिम क्षेत्रबाट पश्चिमी वायु पुनः सक्रिय भएर मौसम बदलीसँगै केही स्थानमा सामान्य पानी परेको छ । यो क्रम भोलिसम्म नै रहनेछ । ” (सोमबार) साँझबाट भने मौसममा सुधार आउने उहाँ बताउनुहुन्छ । 

पश्चिमी वायुको प्रभावका कारण गएरातिदेखि नै देशको उच्च पहाडी तथा हिमाली क्षेत्रमा हिमपात समेत भइरहेको मौसमविद् अधिकारीको भनाइ छ । उहाँका अनुसार आज (आइतबार) राति  बागमती , गण्डकी प्रदेशका साथै लुम्बिनी, कर्णाली र सुदूरपश्चिम प्रदेशका केही स्थानमा वर्षाको सम्भावना रहेको छ । 

पश्चिमी वायु पूर्वतर्फ सर्दै गएपनि कोशी र मधेश प्रदेशमा पानी पर्ने सम्भावना भने नरहेको उहाँको भनाइ छ ।