काठमाडौँ । आइतबारको प्रतिनिधिसभा बैठक शुरु हुनेवित्तिकै गणतन्त्रवादी दलका सांसदहरुले राजावादीलाई थुन्नुपर्ने माग राखे । सत्तापक्षका संसदको यस्तो आवाज सुनिएपछि राप्रपाका सांसद राजेन्द्र लिङ्देनले छाती पिट्दै भन्नुभयो, ‘राजावादी यहाँ छ, सके जेल हाल ।’ 

आइतबारको बैठकमा दोहोरो अवरोध थियो । एकातिर प्रतिपक्षी दल कुलमान घिसिङलाई नेपाल विद्युत् प्राधिकरणबाट हटाइएको विरोधमा प्रधानमन्त्रीको जवाफ माग्दै संसदमा खडा थियो भने अर्कातिर त्यसको प्रतिवादमा सत्तारुढ दल नै आसनबाट उठेका थिए । सोही क्रममा सांसद रामहरि खतिवडा, ठाकुर गैरेलगायतले राजावादीलाई थुन्नुपर्ने माग राख्नुभएको थियो । 

त्यसपछि राप्रपा अध्यक्ष लिङ्देनले आक्रोशित भन्दै थुनेर देखाउन चुनौती दिनुभइको थियो । 

वर्तमान व्यवस्था विरोधी राजावादी समूहले शुक्रबार राजधानीको तीनकुने क्षेत्रमा गरेको प्रदर्शन हिंसात्मक बनेको थियो । उक्त हिंसात्मक प्रदर्शनपछि प्रहरीले राप्रपाका उच्चतहका दुई नेतासहित १०० जनाभन्दा बढीलाई पक्राउ गरेर अनुसन्धान गरिरहेको छ । उक्त प्रदर्शन पूर्वराजा ज्ञानेन्द्र शाहकै योजना र निर्देशनमा भएको दाबीसहित उहाँलाई पक्राउ गरिनुपर्ने कतिपयले बिचार राखेका छन् । सामाजिक सञ्जालमा उहाँलाई पक्राउको माग गर्दै अभियान नै चलाइएको छ ।

तर, राजावादीहरुसहित सो समूहको सबैभन्दा ठुलो शक्ति राप्रपाले आधिकारिकरुपमै यसको प्रतिवाद गरिसकेको छ । शनिबार बसेको केन्द्रीय कार्यसम्पादन समितिको बैठकपछि अध्यक्ष लिङ्देनले पूर्वराजालाई जबरजस्ती विवादमा ल्याउने र राजनीतिमा तान्ने कार्य भएको बताए । पूर्वराजालाई विवादमा ल्याउने कार्यको पार्टीले निन्दा गर्ने उहाँको भनाइ छ ।