काठमाडौँ । नेपाल विद्युत् प्राधिकरणको कार्यकारी निर्देशक पदबाट कुलमान घिसिङलाई हटाएको विरोधमा ऊर्जामन्त्रीको पुत्लादहन भएको छ । घिसिङलाई विद्युत् प्राधिकरणको कार्यकारी निर्देशकबाट हटाएको विरोधमा विद्यार्थीहरुले काठमाडौँको प्रदर्शनीमार्गमा ऊर्जामन्त्री दीपक खड्काको पुत्ला जलाएका हुन् । 

घिसिङलाई विद्युत् प्राधिकरणको कार्यकारी निर्देशकबाट हटाएको विरोधमा नेकपा एकीकृत समाजवादी निकट विद्यार्थी संगठन अनेरास्ववियूले प्रदर्शनीमार्गस्थित विश्वभाषा क्याम्पस अगाडि प्रदर्शन गर्दै पुत्ला जलाएको हो । पुत्लादहनको नेतृत्व नेकपा एकीकृत समाजवादीका केन्द्रीय सदस्य सुदेश पराजुलीले गरेका थिए ।  विद्यार्थीहरुले  प्रदर्शनमा  कुलमानको पक्षमा र सरकारको विपक्षमा नाराबाजी समेत गरेका छन् । 

विरोध प्रदर्शनपछि आयोजित कोण सभालाई सम्बोधन गर्दै पराजुलीले सरकारले दलाल, माफिया र भ्रष्टाचारीहरुलाई संरक्षण गरेको आरोप लगाए । ‘यो सरकारलाई उज्यालो मन पर्दैन, कालो धन, अँध्यारो मनपर्छ,’ पराजुलीले भने, ‘त्यसैले सरकारले भ्रष्टाचारलाई पक्षपोषण गरेको छ ।’