काठमाडौँ । नेपाली कांग्रेसका सभापति तथा पूर्वप्रधानमन्त्री शेरबहादुर देउवाका छोरा  जयवीर सिंह देउवाको विवाहका निम्तालुलाई फूल माला, खादा र उपहार नल्याउन आग्रह गरिएको छ ।

कांग्रेस सभापति शेरबहादुर देउवा पुत्र जयवीर सिंह र कभर गायिका शिवाना श्रेष्ठबीच माघ २१ गते विवाह हुँदैछ ।  माघ २१ गते बूढानीलकण्ठबाटै पारिवारिक जमघटमा विवाह हुनेछ भने भद्रकालीस्थित आर्मी अफिसर्स क्लबमा भोजको आयोजना गरिएको छ ।  उक्त भोजमा राष्ट्रपति, प्रधानमन्त्रीदेखि दलका नेता, उद्योगी, व्यापारी, कलाकार, पत्रकारसहितका व्यक्तित्वहरूलाई निम्ता गरिएको देउवा निकट स्रोतले जनाएको छ ।

देउवा परिवारले पठाएको निम्तापत्रअनुसार आर्मी अफिसर्स क्लबमा फागुन २ गते सोमबार भोजको आयोजना गरिएको छ । जसअनुसार निम्तालुलाई साँझ साढे ६ बजेदेखि साढे ८ बजेसम्म उपस्थित हुन भनिएको छ ।  

देउवाका छोरा जयवीरले सञ्जीव भक्त श्रेष्ठ  र प्रतिभा श्रेष्ठकी छोरी शिवाना श्रेष्ठसँग बिवाह गर्न लाग्नुभएको छ । 
 
प्रधानमन्त्री पदबाट हटेपछि देउवा परिवार धुम्बाराहीस्थित भाडाको घरमा बस्दै आएका थिए । तर, छोरोको बिहे आफ्नै घरबाट गर्ने तयारीका साथ देउवा गत माघ ३ गते बूढानीलकण्ठस्थित निवास सर्नु भएको थियो 

इन्गेजमेन्ट भएको आठ महिनापछि जयवीरसिंह र शिवाना वैवाहिक बन्धनमा बाँधिन लाग्नुभएको हो ।  काठमाडौँमा गत जेठ १ मा दुई परिवार र केही आफन्तहरुको उपस्थितीमा जयवीरले शिवाना श्रेष्ठसँग इन्गेजमेन्ट गरेका थिए । 

जयवीरसिंह शेरबहादुर र आरजु देउवाका एक्ला सन्तान हुनुहुन्छ भने शिवाना पूर्व परराष्ट्र सचिव केदारभक्त श्रेष्ठकी नातिनी हुनुहुन्छ । केदारभक्त परराष्ट्र सचिवसँगै युरोपियन युनियन र अमेरिकाका लागि नेपाली राजदूत समेत हुनुभएको थियो । जयवीर र शिवाना दुवै जनाको छुट्टाछुट्टै व्यवसाय छ ।

जयवीरले ब्लुप्रिन्ट ट्रेडिङ प्रालिमार्फत केही वर्षदेखि व्यवसाय गरिरहुनु भएको छ भने  शिवाना सौन्दर्य सामग्रीको व्यापार गर्नुहुन्छ । शिवानाले केही कभर गीतमा आवाज पनि दिनुभएको छ । जयवीर र शिवानाले लामो प्रेम सम्बन्धलाई वैवाहिक सम्बन्धमा परिणत गर्न लागेको बताइएको छ ।