काठमाडौँ । बिहीबारको निर्वाचनसँगै राष्ट्रियसभामा दलको औकात फेरिएको छ ।  सरकारको नेतृत्व गरिरहेको नेकपा माओवादी केन्द्र राष्ट्रियसभामा सबैभन्दा ठूलो दल बनेको छ । 

माओवादीबाट राष्ट्रियसभामा अहिले उपाध्यक्षसहित १५ सांसद छन् । त्यस मध्येका ३ जना फागुन २० गते बिदा हुँदैछन् । बिहीबारको निर्वाचनले ५ सदस्य थपिएका छन् । यसबाट फागुन २० पछि राष्ट्रियसभामा माओवादीका १७ सांसद हुनेछन् । २०७० सालपछि अन्य दलको टेकोमा अडिएको माओवादीलाई राष्ट्रियसभामा भने सत्र दाउ नै परेको छ । 

१९ सिटका लागि बिहीबार भएको निर्वाचनमा नेपाली कांग्रेसका १० जना निर्वाचित भएका छन् । राष्ट्रियसभामा कांग्रेसका अहिले १० सांसद छन् । ती मध्ये ४ जना फागुन २० गते बिदा हुँदैछन् । राष्ट्रियसभामा कांग्रेसका अब १६ सांसद हुनेछन् । 

प्रतिनिधिसभामा लोकप्रिय मतका साथ दोस्रो दल बनेर प्रमुख प्रतिपक्षको हैसियतमा रहेको नेकपा एमाले राष्ट्रियसभामा भने तेस्रो स्थानमा झरेको छ ।  राष्ट्रियसभामा एमालेका अहिले १८ सांसद छन् । त्यस मध्येका ९ सांसद फागुन २० गते बिदा हुँदैछन् । ९ जना सांसद बिदा हुँदा राष्ट्रियसभामा एमालेले सत्ता गठबन्धनको घेराबन्दीको कारण एक सांसद मात्रै सुरक्षित पारेको छ । बिहीबारको निर्वाचनसँगै राष्ट्रियसभामा एमालेको १० सांसद मात्रै हुनेछन् । 

एमालेबाट फुटेर बनेको नेकपा एकीकृत समाजवादीबाट राष्ट्रियसभामा अहिले ८ सांसद छन् । ती मध्ये २ जना  फागुनको तेस्रो साता बिदा हुँदैछ । बिहीबारको निर्वाचनमा एकीकृत समाजवादीले २ सदस्य थपेको छ । राष्ट्रियसभामा त्यसपछि एकीकृत समाजवादीको ९ सांसद हुनेछ । राष्ट्रियसभामामा अब एकीकृत समाजवादी एमालेसँगै ठककरमा देखिएको छ ।   

राष्ट्रपतिबाट मनोनित एमालेकी विमला राई पौड्यालको पनि फागुन २० देखि कार्यकाल सकिँदैछ । यो ठाउँमा जनमोर्चाकाी दुर्गा पौडेललाई ल्याउने सत्ता गठबन्धनको तयारी छ । यसो भएमा राष्ट्रियसभामा जनमोर्चाका दुई सांसद हुनेछन् । बिहीबारको निर्वाचनबाट राष्ट्रियसभामा जनता समाजवादी पार्टी (जसपा) पनि १ सिट हात पारेको छ ।