काठमाडौँ । काठमाडौँ महानगरपालिकाका मेयर बालेन्द्र  (बालेन) साहले राष्ट्रियसभा सदस्यको निर्वाचनमा मतदान नगर्नु हुने भएको छ । 

राष्ट्रियसभा निर्वाचनमा मेयर साहले मतदान नगर्ने उहाँको प्रमुख स्वकीय सचिव भूपदेव साहले जानकारी दिनुभएको छ । ‘उहाँ मतदान गर्न जानु भएको छैन’ स्वकीय सचिव भूपदेवले भन्नुभयो– ‘कार्य व्यस्तताको कारण मतदान गर्न नजानु भएको भन्ने बुझिएको छ । जाने कुरो पनि छैन ।’

स्वतन्त्र रुपमा उठेर काठमाडौँको मेयर बन्नुभएका साहले गत वर्ष भएको प्रतिनिधिसभा निर्वाचनमा भने मतदान गर्नुभएको थियो । मेयर साहले त्यसबेला प्रदेशसभा तर्फका उममेदवारलाई मत नदिई प्रतिनिधिसभा तर्फलाई मात्रै दिनुभएको थियो । 

राष्ट्रियसभा सदस्यको निर्वाचनमा बागमती प्रदेशको तर्फबाट हेटौंडामा मतदान भइरहेको छ । काठमाडौं महानगरपालिकाका उपप्रमुख सुनिता डंगोल भने मतदानको लागि हेटौंडा पुगिसक्नुभएको छ । नेकपा एमालेबाट उपप्रमुखमा निर्वाचित डंगोल पार्टीका अरु मतदातासँगै हेटौंडा जानुभएको हो ।