काठमाडौँ ।  नेपाल वायुसेवा निगमको वाइड बडी जहाज दोहा उड्ने बेला समस्या आएर रोकिएका यात्रुलाई आज साँझ पठाइने भएको छ ।  

नेपाल एयरलाइन्सको वाइड बडी जहाजमा समस्या कारण ‘ग्राउण्डेड’ भएको छ । जहाज ग्राण्डेड भएसँगै दोहा गन्तव्यमा उड्ने तयारीमा रहेका यात्रु अलपत्र परेका छन् ।  त्यो जहाजबाट काठमाडौँ- दोहा उडानको तयारीमा रहेका २ सय ७६ यात्रुलाई सोमबार रातिदेखि होटेलमा राखिएको छ । 

निगमका प्रवक्ता रमेश पौडेलका अनुसार वाइडबडी जहाजको फ्लाइट कन्ट्रोल सेन्सरमा समस्या आएपछि उडान रोक्नु परेको हो । ग्राउण्डेड जहाजको अहिले प्राविधिक मर्मत भइरहेको छ । रोकिएका यात्रुलाई मंगलबार साँझ वैकल्पिक उडानमार्फत गन्तव्यमा पठाइने उहाँले जानकारी दिनुभएको छ । ‘हिजो राति दोहा उडानका यात्रु जहाजमा प्राविधिक समस्याका कारण रोकिएका थिए’ उहाँले भन्नुभयो– ‘ यात्रुहरुलाई आज साँझ ७ः४५ बजेको उडानमार्फत गन्तव्य लैजाने तयारी गरिएको छ । यात्रुलाई दिउँसो ४ बजे विमानस्थलको समय दिइएको छ ।’
 
निगमको अन्तर्राष्ट्रिय उडानका ४ जहाजमध्ये एउटा न्यारोबडी जहाज मर्मतका लागि इजरायल पठाइएको छ । निगमको जहाजमा पटक–पटक प्राविधिक समस्या आउँदा उडान प्रभावित हुने गरेको छ । अन्तर्राष्ट्रिय उडानका लागि २ वटा न्यारोबडी र २ वटा वाइडबडी जहाज छन् ।