काठमाडौँ । सरकारको नेतृत्व गरिरहेको दल नेकपा माओवादी केन्द्रको विधान सम्मेलन आउने फागुनको पहिलो साता हुने भएको छ । माओवादी केन्द्रले विधान सम्मेलन फागुन १ देखि ३ गतेसम्म गर्ने निर्णय गरेको छ । 

 माओवादी केन्द्रको शनिबार बसेको स्थायी समिति बैठकले विधान सम्मेलनको मिति तोकेको हो । विधान सम्मेलन फागुन १ देखि ३ गतेसम्म आयोजना गर्ने निर्णय भएको पार्टीका उपाध्यक्ष एवं प्रवक्ता अग्निप्रसाद सापकोटाले जानकारी दिनुभएको छ । 
 
बैठकले विधान सम्मेलनको प्रतिनिधि छनोटको आधारसमेत तय गरेको उपाध्यक्ष सापकोटाले जानकारी दिनुभयो । बैठकमा विभिन्न पार्टीसँग एकताका विषयमा पनि छलफल भएको थियो । बैठकले पार्टी एकताका लागि पार्टी अध्यक्ष पुष्पकमल दाहालको नेतृत्वमा एकता संयोजन समिति बनाएको छ ।

बैठकमा प्रधानमन्त्री एवं अध्यक्ष दाहालले मुलुकको समग्र परिस्थितिका बारेमा ‘ब्रिफिङ’ गर्नुभएको प्रवक्ता सापकोटाले जानकारी दिनुभएको छ । स्थायी समितिमा दशवटै प्रदेश इन्चार्जले हालै सम्पन्न अभियानका बारेमा संक्षिप्त प्रस्तुत दिनुभएको थियो । माओवादीले पार्टी रुपान्तरणका लागि गत भदौदेखि ४ महिने अभियान सञ्चालन गरेको थियो ।