पर्सा । पर्साबाट गत आर्थिक वर्षमा सवा ३४ करोड रुपैयाँ भन्दा बढीको अवैध सामान बरामद भएको छ । 

यहाँस्थित सशस्त्र प्रहरी बल नेपाल नम्बर १३ गणले गत आर्थिक वर्षमा ३४ करोड २७ लाख ७८ हजार ३ सय ३३ मूल्य बराबरका बिलबीजक नभएका र भन्सार छली गरेका सामान बरामद गरेको हो । 

सशस्त्र प्रहरी बल गणका प्रमुख राधेश्याम धिमालले आव २०७९/८० को तुलनामा आव २०८०/८१ मा ९ करोड  ८९ लाख ३७ हजार ३ सय ८२ रुपैयाा मूल्य पर्ने सामान तथा उपकरण बढी बरामद गरेको बताउनुभयो । ‘भन्सार छली गरेर भित्रिएका सामानलाई पक्राउ गरेर भन्सार कार्यालयलाई बुझाउँदै आइरहेका छौँ’ उहाँले भन्नुभयो– ‘बिलबीजकअनुसार नभएका सामानसहितका मालवाहक सवारीसाधनलाई भने राजस्व अनुसन्धान कार्यालय पथलैयामा बुझाउँदै आइरहेका छौँ ।त्यही कार्यालयले आवश्यक अनुसन्धान गर्ने गर्छ ।’

सशस्त्र प्रहरी बल पर्साले आव २०८०÷८१ मा भन्सार छली गरेर भित्रिएका १४ करोड ८९ लाख ४८ हजार ५ सय ५६ मूल्य बराबरकाअवैध समान वीरगञ्ज भन्सार कार्यालयलाई बुझाएको छ । 

त्यही अवधिमा बिलबीजकअनुसार नभएका १९ करोड १६ लाख ९६ हजार ९ सय ७५ मूल्य पर्ने सामान बरामद गरेर राजस्व अनुसन्धान कार्यालय पथलैयामा बुझाएको जनाएको छ । सशस्त्र प्रहरीले आव २०७९/८० भने  २४ करोड ३८ लाख ४० हजार  ९ सय ३१ रुपैयाँ मूल्य पर्ने अवैध सामान बरामद गरेको थियो ।