काठमाडौँ । सरकारको नेतृत्व गरिरहेको दल नेकपा माओवादीले विचार केन्द्रित अभियान संचालन गर्ने भएको छ । 

प्रधानमन्त्री तथा पार्टी अध्यक्ष पुष्पकमल दाहाल ‘प्रचण्ड’ ले  ‘जनतासँग माओवादी विशेष रूपान्तरण अभियान’को समापनलगत्तै विचार केन्द्रित अभियान संचालन गर्ने तयारी भइरहेको बताउनुभएको छ ।  ‘४ महिने अभियान पुस १६ गते समापन हुँदैछ, त्यसपछि हामी विचारको छलफल र अन्तरक्रियाका लागि जनतामा नै जान्छौँ’ १ सय ३१ औँ ‘माओ दिवस’का सन्दर्भमा पार्टी केन्द्रीय कार्यालय पेरिसडाँडामा मंगलबार आयोजित कार्यक्रममा उहाँले  भन्नुभयो – ‘त्यसका लागि विचार केन्द्रित अर्को अभियान शुरु गर्छौं ।’

अध्यक्ष दाहालले विकसित परिस्थितिको जगमा विचारको विकास गर्नुपर्ने आवश्यकता औँल्याउनुभयो । ‘आजको राष्ट्रिय र अन्तर्राष्ट्रिय परिस्थिति माओको जीवनकालको जस्तो छैन, माओपछि विश्व परिस्थितिमा निकै ठूलो फेरबदल आएको छ’ उहाँले भन्नुभयो – ‘साम्राज्यवादले नयाँ नयाँ रणनीति र कार्यनीति सहित आफूलाई टिकाइरहेको छ, हामी माक्र्सवादीहरूले ठोस परिस्थितिअनुसार आफूलाई जसरी रूपान्तरण गर्नुपथ्र्यो त्यो गर्न सकिरहेका छैनौँ, आजको मुख्य चुनौती यही हो ।’

दाहालले माओको स्मरण गर्नुको अर्थ विचार र क्रान्तिलाई मौलिक ढङ्गले सोच्नु रहेको उल्लेख गर्दै  माक्र्सवादीले यान्त्रिकता वा अन्धानुकरणमा जानु उपयुक्त नहुने विचार व्यक्त गर्नुभयो । माओवादीको आठौँ महाधिवेशनले संश्लेषण गरेको कार्यदिशा पनि यही नै रहेको उहाँको भनाइ छ । 

प्रधानमन्त्री दाहालले सामाजिक न्याय, सुशासन र समृद्धिको बाटोबाटै समाजवादको आधार तयार हुनेमा जोड दिँदै त्यसका लागि आफ्नो नेतृत्वको वर्तमान सरकार क्रियाशील रहेको बताउनुभयो । ‘सरकारले सामाजिक न्याय, सुशासन र समृद्धिलाई उच्च प्राथमिकता दिएको छ’ उहाँले भन्नुभयो– ‘यसको अर्थ समाजवादको आधार तयार पार्नु हो । त्यसकै आधारमा अगाडि बढ्छौँ ।’