काठमाडौँ । नेकपा एमालेका सांसद लक्ष्मी महतो कोइरीको निलम्बन फुकुवा भएको छ । आइतबार संसद् सचिवालयले कोइरीको निलम्बन फुकुवा गरेको हो ।  

सांसद कोइरीले आइतबार  नै निलम्बन फुकुवाको माग गर्दै संसद् सचिवालयमा निवेदन दिनुभएको थियो ।  संसद् सचिवालयका कार्यवाहक महासचिव पद्मप्रसाद पाण्डेले विज्ञप्ति जारी गर्दै सांसद कोइरीको निलम्बन फुकुवा भएको जानकारी दिनुभएको हो ।  

कोइरीमाथि मधेस आन्दोलनका बेला सशस्त्र प्रहरीका असई थमन बिकको हत्या आरोप लागेको थियो । फौजदारी कसुरमा अदालतले थुनामा पठाउने निर्णय गरेपछि कोइरी सांसद् पदबाट निलम्बनमा पर्नुभएको थियो । मंसिर २८ गते जिल्ला अदालत महोत्तरीले कोइरीलाई सफाइ दिएको थियो । 

अदालतबाट सफाइ पाएपछि कोइरीले निलम्बन फुकुवाको लागि  निवेदन दिनुभएको थियो । उहाँको निवेदन पछि प्रतिनिधि सभा नियमावली, २०७९ को नियम २४८ को उपनियम (५) बमोजिम निलम्बन फुकुवा भएको संसद् सचिवालयले जनाएको छ ।