बाँके । नेपालगञ्जमा आजदेखि सातौँ प्रादेशिक औद्योगिक लघु, घरेलु तथा कृषि, व्यापार एवं पर्यटन महोत्सव सुरु भएको छ । 

लघु तथा घरेलु उद्यमीले उत्पादन गरेका बस्तुको बजारीकरण तथा प्रवर्द्धनका लागि महोत्सव आयोजना गरिएको नेपाल घरेलु तथा साना उद्योग महासङ्घ बाँकेका अध्यक्ष मधुकुमारी खड्काले बताउनुभयो । “लुम्बिनी प्रदेशको आर्थिक गतिविधिलाई चलायमान गराउन महोत्सवले सहयोग पुग्ने अपेक्षा गरेका छौँ”, उहाँले भन्नुभयो । 

चैत १८ गतेसम्म सञ्चालन हुने  महोत्सवमा दुई करोडको कारोबार तथा करिब दुई लाख दर्शकले अवलोकन गर्ने अपेक्षा गरिएको महासङ्घका महासचिव जीआर भुसालले जानकारी दिनुभयो । तराई क्षेत्रमा बढ्न थालेको गर्मीलाई मध्यनजर गर्दै महोत्सव हरेक दिन साँझ ८ बजेसम्म सञ्चालन हुने उहाँको भनाइ छ ।  

महोत्सवका लागि एक सय ७५ कक्ष बुक भइसकेको आयोजकले जनाएको छ । महोत्सवको लुम्बिनी प्रदेशका पूर्वमन्त्री कृष्णा केसीले  उद्घाटन गर्नुभएको हो ।