काठमाडौँ । भौतिक पूर्वाधार तथा यातायातमन्त्री देवेन्द्र दाहाल र नेपालका लागि भारतीय राजदूत नवीन श्रीवास्तवबीच भेटवार्ता भएको छ । 

उहाँहरुबीच आज भौतिक पूर्वाधार तथा यातायात मन्त्रालयमा भेटवार्ता भएको हो । भेटवार्तामा उहाँहरुबीच द्विपक्षीय हितका विषयमा कुराकानी भएको मन्त्री दाहालको सचिवालयले जनाएको छ । 

भेटवार्तामा राजदूत श्रीवास्तवले नेपाल–भारत रेलमार्गका बारेमा चासो व्यक्त गर्नुभएको छ । उहाँले रेल सेवा सञ्चालन तथा व्यवस्थापनका लागि आवश्यक जनशक्तिलाई तालिम, प्रशिक्षण उपलब्ध गराउन भारत सरकार तयार रहेको समेत उल्लेख गर्नु भएको मन्त्री दाहालको सचिवालयले जनाएको छ । 

त्यस अवसरमा मन्त्री दाहालले नेपालको रेलवे तथा विकासका अन्य क्षेत्रमा भारतले पुर्याएको योगदानको प्रशंसा गर्नुभयो । उहाँले आगामी दिनमा दुई देशबीचको सम्बन्ध थप प्रगाढ बन्ने विश्वास व्यक्त गर्नुभएको उहाँको सचिवालयले जनाएको छ । 

भेटवार्तामा मन्त्रालयका सचिव केशवकुमार शर्माले समेत मन्त्रालयसँग सरोकार राख्ने विषयमा दुई देशका अधिकारीबीच छिट्टै बैठक बस्ने विश्वास व्यक्त गर्नुभएको थियो । 

भेटवार्तामा रेल विभागका महानिर्देशक अजयकुमार मुल, सडक विभागका महानिर्देशक रामहरि पोखरेल, विकास सहायता समन्वय तथा गुणस्तर महाशाखाका प्रमुख सुशीलबाबु ढकाल, अन्य सहसचिवलगायत अधिकारी सहभागी रहनुभएको थियो ।