उदयपुर । त्रियुगा नगरपालिकामा पतिको हत्या आरोपमा पत्नी पक्राउ परेकी छन् । 

नगरपालिकाको वडा नम्बर ५ दमौटी गाउँमा पति श्याम राईको हत्या गरी झाडीमा शव लुकाएको आरोपमा प्रहरीले पत्नी ४० वर्षीया निरकुमारी राईलाई पक्राउ गरेको हो । 

प्रहरीका अनुसार ६० वर्षीय श्यामको शव नजिकैको झाडीमा स्याउलाले छोपेर राखिएको देखेपछि स्थानीयले खबर गरेका थिए । अनुसन्धानको क्रममा श्यामको हत्या उनकै पत्नीले गरेको खुलेको हो  । पति हत्याको कसुरमा संलग्न भएको प्रमाणसहित निरकुमारीलाई पक्राउ गरिएको  प्रहरी नायव उपरीक्षक हरिनन्दन चौधरीले जानकारी दिनुभएको छ । प्रहरीका अनुसार निरकुमारीले पतिको हत्या आफूले गरेको स्वीकार गरिसकेकी छन् ।  

निरकुमारीले बयानमा पति हरेक दिन  मादक पदार्थ सेवन गरेर घर आउने र घरमा झगडा गर्ने गरेका कारण आफूले सहन नसकेर  हत्या गरेको बताएकी छन्।