लमजुङ । बेँसीशहर नगरपालिकामा कर्मचारीले नै तलब पाएका छैनन । नगरपालिकाको वडा नम्बर ८ मा रहेको पूर्वाधार विकास कार्यालयका कर्मचारीले लेखा अधिकृत नहुँदा  २ महिनादेखि तलब नपाएका हुन् । 

कार्यालयका सूचना अधिकारी आशिष पोखरेलले दसैँ अघि लेखा अधिकृत यमबहादुर थापा सरुवा भएर अन्यत्र गएसँगै हालसम्म लेखा अधिकृत नहुँदा कात्तिक र मंसिरको तलब पाउन नसकेको बताउनुभयो ।   सहायक लेखा अधिकृतसमेत नभएको लामो समय भएको छ । यी दुवै पदमा दरबन्दी रिक्त हुँदा तलबका साथ साथै विल भुक्तानीसमेतमा समस्या भइरहेको उहाँको भनाई छ । ‘हामीले गण्डकी प्रदेशको मुख्यमन्त्री कार्यालयमा दिनहुँ फोन गरेर लेखा अधिकृत पठाउन माग गरिरहेको र मन्त्रालयबाट चाँडै पठाउने आश्वासन आउँछ तर कर्मचारी आउनुहुन्न’ उहाँले भन्नुभयो ।  २१ जनाको दरबन्दी रहेको यस कार्यालयमा अहिले १३ जना कार्यरत् रहेका छन् ।  आठ जनाको दरबन्दी रिक्त रहेको छ । 

नौ तहको उपसचिव सरहको कार्यालय प्रमुख तीन वर्षभन्दा बढीबाट रिक्त हुँदा निमित्त कार्यालय प्रमुखको भरमा पूर्वाधार विकास कार्यालय सञ्चालन हुँदै आएको छ । दरबन्दी अनुसारका कर्मचारी नहुँदा कार्यालयको काम, गुणस्तरीय योजना, स्थलगत अनुगमन गर्न, कार्यालयमा डकुमेन्ट बनाउनदेखि योजना कार्यान्वयन गर्नलाई समस्या भइरहेको निमित्त कार्यालय प्रमुख विवेक सिग्देलले बताउनुभयो ।