काठमाडौँ ।  तेस्रो राष्ट्रिय डोरीतान (टग अफ वार) प्रतियोगिता फागुन १६ गतेदेखि हुने भएको छ । 

नेपाल डोरीतान सङ्घको आयोजनामा फागुन १६ र १७ गते प्रतियोगिता हुन लागेको हो । सङ्घले सोमबार पत्रकार सम्मेलन आयोजना गर्दै सातै प्रदेशका खेलाडीको सहभागिता रहनेगरी प्रतियोगिता गरिने जानकारी दिएको हो । सङ्घका अध्यक्ष भवानीप्रसाद पौडेलले भक्तपुरको सानोठिमीस्थित एसओएस हर्मन माइनर स्कुलमा प्रतियोगिता आयोजना गर्न लागिएको जानकारी दिनुभएको छ ।

उहाँका अनुसार प्रतियोगितामा पुरुषतर्फ ७ प्रदेश र ३ विभागीयसहित १० टोली तथा महिलातर्फ पाँच प्रदेश र ३ विभागीयसहित ८ टोलीको सहभागिता रहने छ । महिलातर्फ सुदूरपश्चिम र कर्णाली प्रदेश भने सहभागी नहुने आयोजकले जनाएको छ ।

कूल १८ टिमका १ सय ६२ खेलाडी सहभागी हुने अध्यक्ष पौडेलले जानकारी दिनुभयो । प्रतियोगिताको पुरुष विजेता टोलीले  एक लाख र उपविजेताले  ५० हजार रुपैयाँ पुरस्कार प्राप्त गर्ने सङ्घका अन्तरराष्ट्रिय प्रतिनिधि आनन्दकुमार यादवले जानकारी दिनुभयो । उहाँका अनुसार महिलातर्फका विजेताले  ६० हजार र उपविजेताले  ४० हजार रुपैयाँ प्राप्त गर्नेछन् । 

नेपालको पुरानो मौलिक खेल भएर पनि लामो समयसम्म ओझेलमा परेकाले राष्ट्रियस्तरको प्रतियोगिताको आयोजना गरी यसको संरक्षण र प्रवर्द्धन गर्ने उद्देश्य राखिएको यादवले बताउनुभयो । प्रतियोगिता सम्पन्न गर्न ३१ लाख रुपैयाँ लाग्ने आयोजकले अनुमान गरेको छ ।