काठमाडौँ । चीनले अमेरिकी नयाँ भन्सार महशुलको  कडा विरोध जनाएको छ । चीन अमेरिकी राष्ट्रपति डोनाल्ड ट्रम्पद्वारा  बेइजिङमाथि लगाइएको नयाँ करको ‘दृढतापूर्वक विरोध’ गरेको र ‘आफ्नो अधिकार र चासोको दृढतापूर्वक रक्षा गर्न सम्बन्धित जवाबी कदम’ चाल्ने वाचा गरेको बताएको छ ।

शनिबार प्रमुख व्यापार साझेदारविरुद्ध व्यापक कदम सार्वजनिक गर्दै ट्रम्पले चिनियाँ आयातमा विद्यमान शुल्कमा थप १० प्रतिशत कर लगाउने घोषणा गर्नुभएको थियो । त्यसको भोलिपल्ट आइतबार चीनको वाणिज्य मन्त्रालयले विज्ञप्तिमा वासिङ्टनको ‘गलत अभ्यास’ को आलोचना गर्दै बेइजिङ ‘यसप्रति अत्यन्त असन्तुष्ट र दृढतापूर्वक विरोध गर्दछ’ भनेको छ ।

मन्त्रालयले बेइजिङले विश्व व्यापार सङ्गठन (डब्लुटिओ) मा मुद्दा दायर गर्ने र ‘संयुक्त राज्य अमेरिकाले एकपक्षीय रूपमा लगाएको करले विश्व व्यापार सङ्गठनका नियमको गम्भीर उल्लङ्घन गर्छ’ भनी तर्क गरेको बताएको छ ।

‘यी शुल्क अमेरिकाको आफ्नै समस्या समाधान गर्न मात्र असहयोगी नभई सामान्य आर्थिक र व्यापारिक सहयोगलाई पनि कमजोर बनाउँछन्’ मन्त्रालयले भनेको छ– ‘संयुक्त राज्य अमेरिकाले अन्य देशलाई हरेक पालोमा कर लगाउने धम्की दिनुको सट्टा फेन्टानिल जस्ता आफ्नै मुद्दालाई वस्तुनिष्ठ र तर्कसङ्गत रूपमा हेर्ने र व्यवहार गर्नेछ भन्ने चीनलाई आशा छ ।’

‘बेइजिङले अमेरिकालाई आफ्नो गलत अभ्यास सुधार गर्न, चीनलाई आधा बाटो भेट्न, आफ्ना समस्याको सामना गर्न, स्पष्ट संवाद गर्न, सहयोगलाई बलियो बनाउन र समानता, आपसी लाभ र आपसी सम्मानको आधारमा मतभेद व्यवस्थापन गर्न आग्रह गर्दछ’ विज्ञप्तिमा उल्लेख छ ।

‘व्यापार युद्ध वा भन्सार युद्धमा कुनै विजेता हुँदैन’ विज्ञप्तिमा चीनको विदेश मन्त्रालयले भनेको छ, ‘थप भन्सार महशुल लगाउने अभ्यास रचनात्मक छैन र यसले लागू औषध नियन्त्रणमा भविष्यको द्विपक्षीय सहयोगलाई अनिवार्य रूपमा प्रभावित र क्षति पुर्याउनेछ ।’