काठमाडौँ ।  नेपाल स्टक एक्सचेञ्ज (नेप्से) परिसूचकमा सोमबार दोहोरो अंकले सुधार आएको छ ।  नेप्से आज ३६ दशमलव ५७ अंकले सुधार देखिएको हो ।  

परिसूचक १ दशमलव ८० प्रतिशतले बढेर २ हजार ५९ दशमलव  ४९ को बिन्दुमा कायम भएको छ । सोमबार ३ सय ९ कम्पनीको १ करोड ३७ लाख ९ हजार २ सय ७६ कित्ता शेयर, ९९ हजार ५ सय २४ पटक खरिद बिक्री हुँदा ४ अर्ब ६७ करोड ५२ लाख २४ हजार ९ सय ६ रुपैयँँ  बराबरको कारोबार भएको छ । म्युचुअल फन्ड शून्य दशमलव ०१ प्रतिशतले घटेको छ भने अरु सबै समूहको उपसूचक बढेको छ । 

सबैभन्दा बढी जीवन बीमा समूह ३ दशमलव  ७२ र अन्य समूह २ दशमलव ५७ प्रतिशतले बढेको छ । चारवटा कम्पनीको शेयर मूल्यमा आज सकारात्मक सर्किट लागेको छ । सिङ्गटी हाइड्रो इनर्जी लिमिटेड, मोदी इनर्जी लिमिटेड, त्रिशूली जलविद्युत् कम्पनी लिमिटेड र मुक्तिनाथ कृषि कम्पनी लिमिटेडको शेयर मूल्यमा १० प्रतिशतको वृद्धि देखिएको हो ।

सबैभन्दा बढी गुमाउनेमा नारायणी डेभलपमेन्ट बैंक लिमिटेडको शेयर मूल्यमा ५ दशमलव ४६ प्रतिशतको कमी देखिएको छ । कारोबार रकमका आधारका आज सबैभन्दा धेरै सोनापुर मिनरल्स एन्ड आयल लिमिटेडको  २१ करोड ८४ लाख ८२ हजार ८ सय ८० रुपैयाँ बराबरको कारोबार भएको छ । 

कारोबार भएका शेयर सङ्ख्याका आधारमा भने सबैभन्दा धेरै नेपाल इन्फ्रास्ट्रक्चर बैंक लिमिटेडको ५ लाख २६ हजार ३ सय ९३ कित्ता शेयर किनबेच भएको छ ।