पर्सा ।  सिर्सियास्थित सुक्खाबन्दरगाह भन्सार कार्यालयले लक्ष्यअनुसारको राजस्व सङ्कलन गर्न नसकेपछि आव २०८१/८२ मा ५ अर्ब रुपैयाँ  घटाइएको छ । 

कार्यालयले विगत दुई वर्षदेखि लक्ष्यानुसारको राजस्व सङ्कलन गर्न नसकेपछि भन्सार विभागले गत आवको तुलनामा चालु आवमा ५ अर्बले लक्ष्य घटाएको हो । भन्सार विभागले सुक्खाबन्दरगाह भन्सार कार्यालयलाई चालु आवमा  ६० अर्ब ४ करोड ८७ लाख ९७ हजार रुपैयाँ राजस्व सङ्कलन गर्ने लक्ष्य निर्धारण गरिदिएको छ । 

सुक्खाबन्दरगाह भन्सार कार्यालयका प्रमुख भन्सार अधिकृत धनवहादुर बरुवालले भन्सार विभागले कार्यालयलाई चालु आवमा  ६० अर्ब चार करोड रुपैयाा राजस्व सङ्कलन गर्ने लक्ष्य निर्धारण गरेको बताउनुभयो । ‘कार्यालयले गत आवमा लक्ष्यको ७१ दशमलव ७५ प्रतिशत राजस्व असुली गरेको थियो । आव २०७९/८० को तुलनामा आव २०८०/८१ म  ५ अर्बभन्दा धेरै राजस्व सङ्कलन गर्न सकिएको थियो’ उहाँले भन्नुभयो– ‘गत आवमा लक्ष्यानुसारको राजस्व सङ्कलन हुन भने सकेन ।’

भन्सार विभागले आव २०८०/८१ मा कार्यालयलाई  ६५ अर्ब ९४ करोड एक लाख २२ हजार रुपैयाा राजस्व सङ्कलन गर्ने लक्ष्य निर्धारण गरेको थियो । तर कार्यालयले त्यसअवधिमा लक्ष्यको लक्ष्यको ७१ दशमलव ७५ प्रतिशत अर्थात्  ४७ अर्ब ३१ करोड एक लाख ९० हजार रुपैयाा राजस्व सङ्कलन गरेको थियो ।

विभागले कार्यालयलाई आव २०७९/८० मा पनि  ६७ अर्ब ४३ करोड ८६ लाख ९४ हजार राजस्व सङ्कलन गर्ने लक्ष्य निर्धारण गरिदिएको थियो । तर कार्यालयले सो आवमा पनि लक्ष्यको ६२ दशमलव ८८ प्रतिशत अर्थात् ४२ अर्ब ४० लाख २२ हजार ९३ रुपैयाँ राजस्व सङ्कलन गरेको थियो ।