काठमाडौँ । खाना कस्तो स्वादको बनाउने ? ट्वाक्क नुनिलो कि पिरो । वा नुन, खुसार्नी र मसला अत्यन्तै कम भएको ? अधिकांशलाई  खानाको स्वाद कस्तो बन्ला भन्ने चिन्ता हुन्छ । अझ घरमा पाहुना आएको बेला त झन् खाना स्वादिलो नहोला कि भनेर तनाव नै हुन्छ । अब भने यस्यो झण्झेट नहुने भएको छ ।  बजारबाट नयाँ प्रविधियुक्त चम्चा किनेपछि खाना स्वादिलो नहोला भन्ने टेन्सन मुक्त भइने अवस्था बनेको छ । 

जापानी प्रविधि कम्पनी किरिन होल्डिङ्सले व्यवसायिक रुपमै स्वाद बढाउने चम्चा बजारमा ल्याएको छ । यो चम्चाले खानाको स्वाद सुधार्ने कम्पनीको दाबी छ । कम्पनीले केही वर्ष अघि नै यो चम्चा बनाएको हो ।

कम्पनीको अनुसन्धाताले मेइजी विश्वविद्यालयका वैज्ञानिकहरूसँग मिलेर स्मार्ट चम्चा बनाएका हुन् । यस्तो चम्चाले खानालाई वास्तविक भन्दा नुनिलो र स्वादिलो बनाउन बिजुलीको प्रयोग गथ्र्यो । त्यतिबेला कम्पनीले स्मार्ट चम्चा र कचौरा दुबै बनाउन काम गरिरहेका थिए ।

यसले खानालाई वास्तविक भन्दा डेढ गुणा नुनिलो स्वाद थपिदिने बताइएको थियो । तर अहिले व्यवसायिक विक्रीका लागि कम्पनीले चम्चा मात्रै ल्याउन सकेको छ । यो चम्चाको नाम इलेक्स्पून दिइएको छ । यो चम्चाको सहायताले खानाबाट नुनको मात्रा कम गराएर प्रयोगकर्ताहरूलाई स्वस्थ राख्न मद्दत गर्ने बताइएको छ । 

अत्यधिक नुन खपत जापानमा धेरैको समस्या हो । त्यहाँका मानिसहरू कम नुन भएको खाना रुचाउँदैनन् । चाहिने भन्दा बढी नुन सेवनका कारण निम्तन सक्ने गम्भीर स्वास्थ्य समस्या कम गर्न कम्पनीले यो चम्चा ल्याएको हो ।