सिन्धुली । सिन्धुलीमा महिलालाई पोलमा बाँधेर क्रुद्ध तवरले कुटपिट भएको छ ।  कमलामाई नगरपालिका–४, सिन्धुलीकी शारदा थापालाई पतिले आफ्नो लेनदेन बिग्रिएको बेला डिभोर्स गर्न खोजेपछि पोलमा बाँधेर बेहोस हुने गरी कुटपिट गरेको  हो । कुटपिटमा संलग्न शारदाकी पति सन्तोष थापासहित ७ जनालाई प्रहरीले पक्राउ गरेको छ । 

प्रहरी प्रमुख राजकुमार सिलवालले  पतिले आफ्नो लेनदेन बिग्रिएको बेला डिभोर्स गर्न खोजेपछि शारदालाई क्रुद्ध तवरले कुटपिट गरेको त्यसमा संलग्नहरुलाई पक्राउ गरिएको जानकारी दिनुभएको छ ।  ‘शारदालाई बाँधेर राखेकै अवस्थामा हामीले उद्दार गरेर ल्याएर सेफ होममा राखेका छौँ’ उहाँले भन्नुभयो – घटनामा संलग्न उनका श्रीमानसहित ७ जनालाई पक्राउ गरेका छौं । ‘उद्दार गरेर ल्याउँदा उहाँ बेहोस अवस्थामा हुनुहुन्थ्यो, शरीरमा निलडाम छन् ।’

प्रहरी प्रमुख सिलवालका अनुसार विगतमा जग्गाको कारोबार गर्दै आएका शारदाका पति सन्तोषले गाउँका केही व्यक्तिसँग ऋण लिएका थिए । पछिल्लो समय उनको कारोबार बिग्रिएको छ । यहीबेला शारदा डिभोर्सको लागि अदालतसम्म पुगेकी थिइन् । त्यसपछि पति सन्तोषसहित गाउँका केही व्यक्तिले शारदालाई बाँधेर कुटपिट गरेको हो । शारदाले केही दिनअघि आफूलाई पतिले अपहरण गरेको भन्दै प्रहरी कहाँ जानकारी गराएकी थिइन् । आफूलाई सिस्नु पानीले हान्नेको समेत उनले प्रहरीलाई बताएकी थिइन् । तर, त्यसपछि उनको मोबाइल समेत अफ भयो ।  ‘उजुरी गलत रहेछ कि क्या हो भन्ने भइरहेको थियो’ प्रहरी प्रमुख सिलवालले भन्नुभयो – अन्य माध्यमबाट बुझ्ने प्रयास गरिरहेका थियौं । ‘त्यहीबेला शारदाकी दिदी आएर कुटपिट गरिरहेको भनेपछि म आफैं त्यहाँ पुगेँ ।’