काठमाडौँ । संस्कृति, पर्यटन तथा नागरिक उड्डयनमन्त्री सुदन किराँतीले पुस ४ गते दिएको अभिव्यक्तिलाई लिएर विरोध प्रदर्शन भएको छ । सनातन धर्मावलम्बी नेपालको आयोजनामा मन्त्री किराँतीविरुद्ध आइतबार काठमाडौँमा प्रदर्शन भएको हो । 

सनातन संस्कृतिको खुलेआम विरोध गरेको भन्दै किराँतीलाई मन्त्री पदबाट बर्खास्त गर्नुपर्ने प्रदर्शनकारीको माग छ । मन्त्री किराँतीले क्रिश्चियन ‘धर्मविरोधीलाई जेल हाल्नुपर्छ’ भन्ने भनाई व्यक्त गरेपछि त्यसको विरोध भइरहेको छ । 

विरोध प्रदर्शनका क्रममा नेपाल सनातन धर्म संस्कृति संगठनका अध्यक्ष पुष्पराज पुरुषले देशको बहालवाला मन्त्रीले कुनै समुदायको कार्यक्रममा गएर अरु समुदायलाई निन्दा गर्दै एउटा समुदायलाई उचाल्नु गलत भएको बताउनुभयो । मन्त्री किराँतीले ‘सामाजिक सद्भाव बिगार्ने’ काम गरेको र उहाँलाई ‘बर्खास्त गर्नुपर्ने’ प्रदर्शनकारीका माग छ । 

विरोध प्रदर्शनमा सहभागीहरुले ‘गैरजिम्मेवार मन्त्री बर्खास्त गर, सुदन किराँती राजीनामा दे’ लगायतका प्लेकार्ड बोकेर नाराबाजी गरेका थिए ।