चितवन । नारायणगढ–मुग्लिन सडक ४ घण्टा बन्द हुने भएको छ । तुइन खोलामा पुल निर्माण गर्न पुस ७ गतेदेखि दैनिक ४ घण्टा सवारी आवागमन बन्द गर्न लागिएको नागढुङ्गा–मुग्लिन सडक आयोजना पश्चिम खण्ड (नारायणगढ–मुग्लिन) ले जनाएको छ । 

आयोजनाका अनुसार सवारी आवागमन बिहान ११ बजेदेखि दिउँसो ३ बजेसम्म बन्द गरिनेछ । नारायणगढबाट मुग्लिनतर्फ जाने सवारीसाधनमध्ये यात्रुवाहक सवारी साधन पन्ध्रकिलो बजारदेखि जुगेडीसम्म रोकिने छन्भने मालवाहक सवारीसाधन भतेरी जंगलदेखि रामनगरसम्म रोकिने छन् ।
 
काठमाडौँबाट आउने यात्रुवाहक सवारी साधन मुग्लिन बजारदेखि मनकामना केवलकारसम्म र मालवाहक सवारी सधान लेवाटारमा रोक्नुपर्नेछ । पोखराबाट आउने यात्रीवाहक सवारीसाधन वेनीटारदेखि पावरहाउससम्म र मालवाहक सवारीसाधनलाई सत्रसय फाँटमा रोक्नुपर्ने आयोजनाले जनाएको छ ।

सडकका १९ पुलमध्ये ४ वटा चार वर्ष अघि निर्माण भएका छन् ।   बाँकी १५ पुलको काम  एकै साथ थालिएकोछ ।